最近甚囂塵上的教育議題為「升中自行分配擬三月通知」，有家長走來和我討論，他說報章說得不清楚，希望我澄清一些細節，以下為我們討論內容：
趙為本人 家為家長
家：趙Sir，究竟教育局想在每年三月「放榜」，還是「通知」獲取錄的學生，因為有報章話係「放榜」、有話係「通知」？
趙：實際上係由學校個別通知獲正選取錄學生，唔係放榜。
家：點解唔直接放榜呢？
趙：如果三月放榜有技術上困難，因為中學參加派位學生可以向兩間中學申請，如果兩間都一齊收同一個學生，呢兩間中學便會三月用書面或電話方式通知學生，因為申請者只能獲派一間中學，所以最終仍然要七月放榜，將申請者第一選擇中學派俾佢。
家：明白，雖然係咁，我家長無論如何都想早知道自行分配個仔女申請得唔得，得就唔使四圍走去撲，又要報十間八間直資，三、四間私立。
趙：你唔鍾意七月放榜，寧願三月接到通知？
家：梗係啦，我做家長，都唔明白教育局做乜，小學就可以十一月自行分配放榜，但中學就唔可以，莫名其妙；你諗，如果中學可以三月就通知獲取錄正選申請學生，以今年中學有五萬申請人來計，至少可以紓緩三成，即一萬五千個申請者同埋佢家長壓力，一來唔使再填表申請統一派位，二來唔使出去撲直資同私立中學。
趙：係，的確可以減少香港四、五萬人由四月至七月壓力，亦可以減少浪費至少一萬五千張紙（統一派位表格），為環保盡一分力，其實呢個莫名其妙七月才放榜制度用二十年，無端端用了三十萬張紙，教育局要負部分責任。至於有人話提早通知會令不獲取錄學生有壓力，呢個講法唔通，以前七月放榜一樣大家有壓力，而家人獲取錄，你不獲取錄反而應該要加一把勁，盡力爭取呢個最後機會，好過以前，以為自己有機會hea住來讀，你話係咪？
家：完全同意，我認為提早通知，有百利而無一害！