小一自行分配學位已於十一月二十一日放榜，有一位神色凝重的家長走來問我派位落空如何是好？他不想搬屋，只希望我傳授幾招填表「秘笈」給她。我答秘笈就冇，心得就有。以下為本人和該家長談話內容，有興趣知道統一派位填表心得的家長可細心閱讀。
趙為本人
家為關心子女的家長
趙：為什麼不想搬屋？
家：有兩個原因。其一為麻煩兼嘥錢。俗語有云「上屋搬下屋，失去一籮穀」，而且就算搬了屋也未必一定派到，所以不搬；其二為統一派位甲部可以揀18區嘅小學，即係唔搬都有機會選心儀小學，所以決定一動不如一靜。
趙：同意。不過甲部學位甚少，這一點你是否知道？
家：唔會少到得一兩個學位吧？
趙：唔會。統一派位甲部嘅學額係佔全小一學額一半又10%，例如間小學嘅小一，有100個學額，統一派位嘅學額就係100個學額嘅一半，即係50個，50個學額嘅10%即係有五個學額。
家：咁如果小一有150個學額，一半就係75個，75之10%大約有八個，對不對？
趙：對！
家：甲部有三個選擇，點樣填最好呢？
趙：好多家長問我是否需要填晒三格，我嘅答案是如果你心目中有三間最心儀小學，便需填滿三格，如果你心中只有一間最心儀小學，便只需填一格，留空兩格了。換句話來說，我主張只填最心儀，唔主張為咗避免蝕底而將次心儀或者三心儀都填入第二格同埋第三格。因為萬一咁啱就算派咗次心儀或三心儀小學俾你，你便會失去乙部進入最心儀小學嘅機會了。
家：明白！即是千祈唔好怕蝕底。好啦，咁統一派位乙部嗰30格又點填呢？
趙：以下有三個戒條：一是不要「從一而終」，即是不要將30格都填你間心儀小學，咁樣做電腦只當你選了一間小學；二是盡量填滿嗰30格，例如你住嘅學校網只有15間小學，你便將所有15間都填滿，就算你有一兩間唔鍾意嘅小學都要填埋上去，因為你唔填，教育局一樣會派俾你；所以寧願自己填好過。三是不要將最心儀、次心儀、三心儀順序由第一間填到第十間。因為派位是逐個選擇派。萬一你順序填，而第一選擇派唔到，便論到另一家長揀，如果佢將你嘅次心儀小學填上第一選擇，而其他家長又將你次心儀、三心儀都填上第一選擇，如此這般，你那些第二心儀至第六、第七心儀小學，都可能被「搶」得一乾二淨。到輪到你揀第二選擇時，可能只剩下沒有人想要的小學了。
家：那有什麽策略應付？
趙：我提議你用「以退為進」法。第一格填最心儀小學，放棄第二和第三心儀小學，然後將第四心儀小學放在第二格，第五心儀小學放在第三格，希望用呢一個方法，派到第四和第五心儀小學。如果你不這樣做，可能在第一最心儀小學失手之後，便一路跌到第八第九間小學才派到了。用大抽獎來派位要講運氣，用「以退為進」是在冇辦法之中嘅辦法，希望能幫到你。
家：要得到幸運之神關注，不是容易的事。
趙：心裏常存正能量，多些關心別人、幫助別人，心裏自然有種幸福感覺，有幸福的感覺，幸運之神自然來， 因為幸福是幸運的孖生兄弟！
家：多謝趙sir介紹這對孖生兄弟俾我認識，我會銘記於心！