如果將這一年半載發生一籮籮密襲的大小事，塞入雪櫃，我今日又開長途車，去農場學堂去接未嫁做我的老婆瑪莉亞和小紅人ＢＢ碧翠絲，沿途無繁華富貴，一味是綠色和啡色，叫孝活下載幾十隻我聽極不厭的五六十代歐西流行曲放在車內……Do-doo-doo wah……Shoo-be-doo-be……我就會跟Johnny Rivers把整首《Poor side of town》從頭唱到尾……這個翻版車程，百分百是當年……其實一年，我心思思又開車去屯門，去𠱁寡母婆和她相依為命，不知父母是誰在何方的外孫一歲ＢＢ，湊這一大一細遊車河，去海灘砌沙堡壘，去食自助餐，ＢＢ只得一種遊戲，爬到高櫃頂跳下來做空中飛人，要我接往……所以，一年之後，日日肯做往返農場出入城中的情景，也是相識的綺夢重溫……我還記得未到之前有賣下午茶點的店檔，有ＢＢ成日提起的蛋撻仔，我情願遲到，折回買去，看她將整個塞入口裏……「你去咗邊呀？ＢＢ唔見咗人成個鐘，我哋發散人啱啱至揾番佢，佢匿埋猛喊呀，猛捽眼呀，我未見過佢咁淒涼……你快啲嚟……」我也未聽過瑪莉亞咁淒涼，漏取蛋撻就跳上車，又輪到孝活接棒來電：「我同阿Pam要出返去搵律師保阿天奴叔個大仔呀，佢頭先同阿師兄間公司個策劃嗌交，仲郁手打到個人滿面血，我飛緊車入城，蓋Uncle唔方便出面，阿Auntie Mary一陣會幫手講數，阿Pam你同Daddy講……」
「咪住，咁阿師弟點解唔擺平件事先……」
「Daddy，嗰個人恃住人面廣，本來幫手代阿師兄睇住廣告公司點同阿ＢＢ影輯相，後來聽師兄講，呢個嘢愈嚟愈……食乜嘢……」
「食碗面反碗底呀。」
「阿Maria叫我都快啲返到嚟，話ＢＢ唔見咗……」
「就係嗰個衰人搞喊ＢＢ，影相影得好地地，佢撩阿ＢＢ，無端端猛問ＢＢ知唔知，自己親生爸爸媽媽去咗邊，係唔係唔要佢呀，ＢＢ都詐聽唔到，個衰人仲講，搞到ＢＢ冇心機，唔肯再影走咗去……」
「咁阿黑炭頭點解要同呢條友打交？」
「但師兄喺隔籬班房上緊堂，見ＢＢ喊住走過，個衰人知大件事，仲發喳，『發爛喳』。」
「得啦得啦，我聽得明，Howard你小心揸車。」
「佢仲惡人先告狀，話今日影唔成相，就要賠錢俾個客，仲『恐』阿師兄心口。」
「Pam你俾我講一句，嗰條友，仲大聲話係阿師弟講俾人知，個細路啲老竇老母係撞車死嘅，師弟青筋都現晒，當眾發誓自己冇講過，Maria姐姐又入到嚟，佢唔想再人人喺度睇戲，又搵唔到ＢＢ，就捉師弟一齊去搵，師弟大大聲要炒咗呢個嘢，阿黑炭仔見條友仲死唔斷氣猛講粗口，佢衝上前，一拳咋，就打到佢撻落哋嘔白泡……」
「好吖，同我哋個個報咗仇先。」
「爭啲撞車啦，阿Daddy你快啲去錫番阿ＢＢ，佢其實咁細個，可能佢係知道好多嘢……快啲去喇，Maria姐姐都好陰功。」
ＢＢ只是逃到近在咫尺，無人想到，將要拆建的小聖堂，聽說她的朋友是一隻小山羊，未改名字，牠在一堂長石梯望下來，關心新朋友不知為何掩着面仔在嗚嗚流淚，她硬直的外婆瑪莉亞也在流淚。我見到教堂還有水源，唯有滲濕T恤，「你手仔咁污糟，唔好用嚟捽眼喇，俾隻左手我抹吓，隻右手呢……阿羊仔喺上面望實你呀，你估佢鍾意你摘啲梨仔，定我帶嚟啲蛋撻仔？佢唔敢落嚟，你叫佢落嚟……」