瑪莉亞近日是神不守舍的冠軍，「我想行開吓……」
「去遊埠？定返香港？」
「我淨係想同你行開吓？」
「行開幾耐？」
「唔識答你。」
「使唔使睇醫生？」
「冇用。」
「行開吓會有用咩？」
「行開一日喇，交阿ＢＢ俾師弟睇住，一日已經夠，你可以照樣講乜都得，唔使好似呢排咁，乜都就住我。」
於是向家姊請假，周末日半，包架旅行Van司機不懂廣東話，任由在附近城市小鎮亂兜。師弟安排ＢＢ加兩堂幼兒芭蕾亂跳的課堂，個個都病後欠補，心知肚明，不問因由，放我二人一馬。
司機務求要知道客人喜好，開車前由酒店公關出盡牙力，我們對任何美食，山水，海上遊，登空汽球，農場，法國村，佛寺，全無興趣，但求汽車不停開動，半夜前去到林中旅館落腳即可。
「我哋當為ＢＢ做survey，第時帶佢周圍逛，大把日子。」
「我哋？如果唔好彩死咗一個，剩番嗰個帶住個ＢＢ仲周圍去，實係見到乜，都會諗起唔喺度嗰個……」
「你不如唔好做網上經紀，正式開住間地產舖仔先，唔好再放時間黐埋我哋幾個食飽無憂米，職業特工隊咁，嗱，冇緊要事就唔好搵你，忙得滯，就前鋪後居，做老闆娘眼瞓，鍾意瞌幾耐就幾耐，阿ＢＢ有得入幼兒班，想見佢，咪叫人湊佢放學，嚟搵你去飲下午茶，出去食雪糕，幾好呀。」
「咁你呢？」
「你係咪想教我以後點？」
「如果我掛住出去做生意，好恨想見多啲你呢？」
「咁俾面？我哋有冇結到婚，都已經一齊瞓咗好耐喇。」
「我哋而家都好老奉，乜嘢都係你哎吔家姊搶住照咗先，ＢＢ都慣咗啲銀紙係自動印咗有得派俾我哋咁……我唔敢教你都要以防萬一，但我有手有腳，都想勤力啲儲番啲錢俾個屋企。」
「嘩，俾個屋企，咁嚴肅？」
「你！」
「我乜嘢？」
「我都成半百……咁耐都冇乜有男人𠱁過我……係得你，你講乜，我都冇乜覺得唔啱聽……」
「我都冇乜女人𠱁到我，趁今日咁好日唞，你𠱁多我兩句吖。」
「我帶唔夠衫……我成日……仲係好掛住你件一陣煙味嘅皮褸……」
「好彩個司機唔識聽我哋講乜，唔係就毛管戙到撞車都似。」
入夜不想摸入遊客區祭肚，叫司機求其買外賣回來放低在車廂，指使他留在食肆做豪客。貪得無厭，到達蟲聲四起的旅館，二人同心，車箱放下坐墊，擠逼得很到位，又勒令少見世面的司機上樓，代替我們佔據已付訂金的房間。