八大高層緊急會議改在酒店頂樓舉行上半部，下半部瞬雷不及掩耳，才移師去山旮旯大本營埋尾，事必有因。
ＢＢ昨晚輾轉不眠，今早穿戴齊整，如睡公主再在沙發安哥再睡，其餘人等，汽水蓋和師弟知要外出，又試同一造型，前者減了江湖氣，後者就收肚演胸，家姊今日如法官一般的莊嚴，我從來對她如何永不重複裝扮，是否有幾十個衣箱跟身，毫無興趣八卦，幸好未來老婆識做人，偶然一兩句恰好的讃歎，無落錯鞋油。
「做乜阿ＢＢ瞓着，隻手仔都久唔久舉高想開槍咁？陰功，咁細個人，梗係啲陰影未散，阿師弟你去開還神嗰陣，順手同ＢＢ領枝平安籤喇……」孝活已接到彭美拉上來共聚。
「今日就等阿Honey，講吓我哋點解要撲嚟撲去，你主持大局喇。」
「冇嘢嘅，我最信得過嘅天奴叔，佢搜左嗰邊成晚，發覺多咗啲新裝嘅偷聽器……」
「吓？愈嚟愈似特務片咁。」
「阿Howard爹哋係咁跩，佢知我哋個個都冇覺好瞓，想我哋唔好硬晒軚咁……」
「唔係呀，連Pamela都估唔到係邊個咁快手，我唔敢亂估。」
「我希望唔係我愈幫愈忙……蓋Uncle，你先唔好怪我，因為咁大件事，我屋企啲人，點解樣樣都咁快知道，但又冇返嚟睇吓點，連我同易Uncle你位公子猛散啲似就嚟結婚嘅新聞，我爹哋同我而家嘅媽咪，都冇彈起，又冇追問，所以我都覺得有啲唔對路……蓋Uncle，雖然今次你好彩冇事，但今朝我捉實老管家阿天奴，佢其實係喺我屋企睇住我大，佢終於講我知，佢話……你有個親信叫阿趙，自從你離開咗香港之後，佢都失咗蹤幾個月，但突然打電話嚟吉隆坡俾我呢邊同阿天奴講，佢好好心，話蓋Uncle想同佢做事嘅人，個個都好好地生活，唔准佢哋再掂你任何一件事，佢話，我而家個媽咪，係知道好多蓋Uncle你同對頭人好多嘢……所以嗰晚，唔怪得知，等我哋鬆一口氣，半夜佢哋先至突然郁手……咁多位，我晤知有啲咁複雜嘅關係……」
「唔緊要唔緊要，我哋呢邊都好複雜……」
「喂阿細佬，我都唔出聲咯，講少句喇……」一直眼定定的汽水蓋，讓大家都眼定定的望着他，孝活遞過一杯不是烈酒的熱茶。
「Pamela，難為你，我今次返嚟係唔聽話，我個媽打，你哋個Mary姐，幾想見吓我，都唔准我返嚟，我係預咗聽完睇完佢做善事，就算淨係攬吓佢，已經夠啦，成件事要多謝你嗱屎上身，唔好意思，我講嘢係咁粗俗，我點會諗到，臨尾我都走唔甩，係會冇命，點知，坐喺呢度，個個都有份救我。阿師弟爭啲俾佢嗰條韓國婆捅死，仲未止，後來黑鼆鼆又為我擋咗粒子彈，Pamela你同Howard，分分鐘個韓國婆追到你哋架車，醒個炸彈俾你宵夜，咁你兩個就要响地府結婚，你哋唔好笑，到我兩兄弟阿ＰＫ，佢講嘢就成日吹脹你，但佢遇到唔係你死就佢亡，你有十條命都唔夠佢嚟，仲有阿嫂，唔好以為佢女流之輩，佢成日攬住個ＢＢ當命根，但為咗秤起服裝間度門，俾我扶住阿師弟落去，又要俾番阿ＰＫ上返嚟，度門幾十磅㗎大佬，仲唔止，嗰個躝癱衝返入去，係就係阿ＰＫ好彩咁神化，叫個仔頒枝改裝過射撞針嘅玩具槍，見條友睇中個䁥埋嘅ＢＢ，冇法唔開槍亂射，偏偏中正對方以後冇仔生嗰度，條友痛到掉甩枝真槍，都仲未止，一個一歲嘅細佬哥，乜嘢係槍，係會死人嘅，佢點會知，但佢識得掃走嗰枝會殺死佢全家，嗰枝唔知係乜東東，咁我哋終於先至人齊，今日個個生勾勾坐晒喺度，我篇演講辭講晒啦，悶親阿ＢＢ，打鼻鼾添，阿Howard，你杯茶好好飲，媽打，我應承你，咁多人冇死到，都係想我做番個好人啫。」