哎吔家姊古稀之年，七十有二還來個第四春，兼即將升呢做拿督夫人，頒布聖旨勒令港方我等三大一小前去吉隆坡贈興，抗旨不尊，罪無可赦。本來老瑪莉亞，開到口勸宋瑪莉亞，齊齊與我同步拉埋天窗，更物極必反，但竟然負負得正。
「我唔係驚你家姊大石砸死蟹，但佢咁大陣仗，喺當地都好大新聞，點可以加插啲平民百姓，湊夠兩啤同佢哋一齊行禮，有失佢哋身份喇，做佢伴娘都未夠班喇……」
「你咁多嘢講，即係諗好晒你個心想點喇，阿ＢＢ一歲就有得搭飛機遊埠，你岔禍佢冇得去，佢嬲你一世呀，你sell阿家姊你情願做伴娘，咁味順吓佢意，冇得失佢囉……sell埋阿Howard做伴郎，還晒人情債喇。」
「真唔制呀，你個仔後生過我成十年，影老晒我呀。問過你家姊先喇，將功贖罪嘛，佢實有好多主意嘅。」
「佢實話點解唔一於叫阿Howard個老竇做伴郎唧？我就實警告佢，我個仔個老竇，一去到實有大把阿嬸起痰，搶晒鏡頭。」
「我都老實話你知，我之所以肯去，係阿ＢＢ張出世紙同我嘅領養手續，一直都仲有嘢棘住，但你家姊開過口，佢喺邊度，都有把炮幫我哋搞掂呢啲咁濕碎嘅事，今次ＢＢ如果想出境冇阻滯，就要旨意你家姊……」
「所以我成日話，我一定要死先過佢。」
「咁你一於犧牲吓，俾啲阿嬸猛𥄫實你喇，阿ＢＢ大咗，聽到呢個古仔，佢一定笑到好開心。」
孝活本來留到ＢＢ妹過了生日，就重新回去個乜乜生物種子庫做長工，但哎吔家姊又好人，提供新加坡同大馬重磅人物，會捐助基金讓他帶回奧斯陸做手信，於是大條道理延遲一個月離開我這個老竇，這個拜家姊賞賜的四人八足的旅行團，有幾重說不出口的意義。有遺傳因子打賞給兒子，種善恩得善果，做仔的反過來，趁我未賣鹹鴨蛋，趕得及將我改造成材。
天光前，發了個測謊機的綺夢，我終於跟ＢＢ妹的阿嫲在教堂門口，大家都穿足禮服，ＢＢ做了花童，兩個大人隨遇而安的表情，怕者領會到，總好過曲終人散。
真人落樓晨運，失驚無神見宋瑪莉亞跑過。「乜你貪高興呀？由你屋企嗰邊跑到過嚟？」
「我呢排愈忙就愈肥，條條裙要扐去放，先至著得落……」
「咁唔得喎，都好，伴娘有個肚腩，阿家姊實讚你識do。」
「我今朝六點扎醒瞓唔番，我發咗個夢好得意嘅，有個好大陣仗擺結婚酒嘅西式嘅……但又空框框冇人到嗰喎……」
「咁又點唧，有冇發到我喺度？」
「都話鬼影都冇隻咯，最怪我轉身瞌着，好似重播咁，又試發番同一個地方，仍然係吉嗰喎……阿Howard喺度做乜嘢呀？」
「仲瞓緊啩！」
「唔係呀，佢企喺大門口呀？」
「你衝落嚟做乜呀？樓上火燭呀？」
以淡定取勝的孝活，除了扮殭屍嚇ＢＢ妺，難得有這個表情。