ＢＢ妺的一歲生日慶典，由三個大人操控，不必跟隨出世紙的十月三十號，她媽在手袋翻出該從未公開的法定贓物，我仍未將忍者功破戒，無射籬眼偷𥄫ＢＢ以及雙親姓甚名誰。宋瑪莉亞和孝活明知身在大馬的哎吔家姊，早兩日已快遞巨型紙箱過來，內容必定要乜有乜，驚天動地，所以籌備委員一切從簡，晚飯後由小蛋糕撐場，孝活用才華搭夠，手風琴拉出快樂生辰，ＢＢ妺立即雙掌拍枱配合節奏，繼而與其母大會攝影師唱雙簧。
「多謝邊個呀？」
「媽媽！」
「唔係媽媽，我係嫲嫲，呢個有鬍鬚嘅呢？」
「PK Uncle。」
「發音好正噃，係咪練咗成日呀？呢個人夠有鬍鬚咯。」
「佢冇多鬚鬚，佢有眼鏡，佢係拷鑊粥粥。」ＢＢ妹其實早就有應酬的會話藏在肚裹，儲夠在今晚開齋。「呢間屋咁大間，係邊個送俾阿ＢＢ㗎？」孝活將紙箱頂揭開，舉起ＢＢ假將她放入去，「快啲多謝邊個呀？」
「多謝婆波，婆波幾時返嚟呀？」還加送向着手機作掙扎的身體語言。
「乖咯，婆婆有錄咗音同我哋傾偈呀，聽咗先至拆禮物喇。」
「睇吓阿家姊錄咗幾長？分分鐘仲長過拆晒啲禮物呀，邊個要去廁所好去啦……」
天佑我王開始，眾手持叉碟含蛋糕聆聽。
阿ＢＢ妺快高長大呀，婆婆錫晒你吓。嗱，我呢，想你哋四個，三大一細𠱁吓我開心，阿拿督呢，佢唔俾我返香港呀，佢話，除非我趁呢排大家都冇乜嘢做，就不如趁天氣都幾好，就……就啱人人都行得開咯，吓，咪一於，你哋都估到佢想點㗎喇……
這邊，眾卿家愈聽愈坐直身子，哎吔家姊甚少含欖般，少女情懷總是詩，孝活笑到蛋糕從口角噴出來，宋瑪莉亞同ＢＢ像心領神會，剩下我覺得還有高潮湧現。
嗱，佢畢竟有頭有面，我又原來仲有好多老影迷係喺大馬呢便，唔求其得㗎嘛，快快趣趣，都要兩三個禮拜喇，諗起都頭痕，嗱，人一世物一世，阿Maria你就同公司請個長假，行唔開就當我係你個客，同你哋喺我呢便買疊別墅，乜嘢價位都得，話唔想得失我呢個大客，咁咪甩得身囉。阿Howard仔我知你好踏實嘅，我叫阿拿督安排一餐飯同啲大使呀，國際基金呀，支持吓你咁落力啲北歐嗰幾個國家啲文化事業，包你唔會空手而回。至於阿細佬呢，我知你聽到打喊路，瞌眼瞓，嗱，我俾隻牌你上，唔好咁大鼻喇，阿Maria，我代佢𠱁番你，你兩個可以趁高興，咪嚟吉隆坡註冊兼中式又得西式又得，橫掂我個籌備團隊多人多到震，包冇甩拖。仲有呀，呢度啲教育制度啱晒阿ＢＢ妺自細有好學府，愈講愈着緊過我嗰筆呀，阿ＢＢ妺，有冇份聽到婆婆我講乜呀？……
ＢＢ妺竟然放下禮物，有如家姊潛伏之馬仔，立即拍掌又跳又笑：「婆波……婆波呀……」見過大小風浪局勢的我和瑪莉亞，此際都似整容失敗，五官失職，懵口懵面。
孝活還火上加油，與ＢＢ搶拆大小禮物，「嗱，阿Auntie婆婆，呢次其實係借花敬埋佛，你哋知唔知，佢有一次試探我，問我覺得宋小姐點，話如果我同佢行埋，咁，佢係我老婆你新抱，阿ＢＢ變咗你個孫，咁咪一家人見多啲又得，見少啲又得，我估唔到Auntie婆咁開明，嚇到我鼻哥窿冇肉……」
「你係咪打得少，呢位小姐，你近佢，你側邊咪有枝棍，你同我仆濕佢！」