「你做乜四張幾，就殘成咁，殘到你老竇咁……」雖然兩仔爺多過四五年冇聲冇氣，總有幾分，一眼就化灰都認出來。
「我扶你坐番起身先，周地玻璃呀。」
「你點入到嚟㗎？唔使審，又係阿蓋Uncle個阿媽帶你嚟，你個妺冇又一齊嚟趁高興吖嘛？」
「Auntie Maria話你唔鍾意見到阿Isabel吖嘛，我返咗嚟都冇去見過佢，我知佢買咗我哋細個住過，响呢頭向海邊嗰間屋。」
「咁你返嚟做乜呀，咁耐去咗邊呀？結咗婚定離咗婚呀？」
「原來你籮柚有𠝹親呀，有冇紅藥水放喺邊？我同你掃開地下啲嘢先……」
「做乜你都兀吓兀吓，你都領嘢呀？唔好搞，夜啲有阿嬸嚟打掃，攞兩罐啤酒坐吓先。」如果我扎醒只見他下半身，會以為是師弟黃天蕩從大馬回來，同樣是出過事一拐一拐，左右腳鞋踭有高矮，今早講大話有心絞痛，下晝就應棍了。
「你郁唔郁得？我想落樓下食枝煙？」
「吓？我食親煙你都憎到擰歪面，而家輪番到你？我自從碌落樓梯跌穿頭，每日一包都戒到早晚一枝……」
「Auntie Maria話有個ＢＢ成日嚟，話你錫住佢，連煙都食少咗……」
「我呢個哎吔家姊，正一路透社創辦人，講乜佢都有料過兩棟俾你知……」為了看清楚他落樓的狀況，我也拿起一罐生啤緊隨。
門口勉強算是小花園的地帶，一個月之內，變成與仔女做大龍鳳的豆丁舞台。「Howard」的確似我結婚時的五官，餅印一樣。但正派到日日一定沖涼的教書先生，零沾染我的衰格。假如下個月左腳要打螺絲，就跟他扯平了，一個跛左腳，一個跛右腳，兩父子二人三足。
他噴煙的力度，吐出來滅火喉一樣，「我俾你由細鬧到大，都話我死蠢，到○六年我响丹麥，一條乜都冇嘅巷仔，俾架大貨車撞歪咗半邊身，死唔去，我唔敢話俾任何人知，更加唔敢話俾你知，真係好死蠢，你會好嬲……我打橫過咗去挪威Oslo嗰邊瞓咗醫院大半年，先至落到地行得。好番之後，我考到入奧斯陸大學做研究生，我逐漸變咗個好硬淨嘅人，一年前我仲幫寄住生物種子庫做義工，我有一日同自己講，你有冇當冇咗我，我都想見吓你……俾枝你啲煙我食吖……講咁多嘢……悶到你抽筋……」
「我都未見過，你望實我，好好哋咁，講晒咁多嘢……」
「孝活」上中學之後，直到今日，我都未好好的攬他一次，被大貨車撞歪過半邊身的體魄，仍然孔武有力，由頭頂到腳踭，都比我硬淨。