今次碌落樓梯不止仆街，橫生各種症狀來趁高興，無食慾，頭痛痛爆，間歇失憶，時舉時不舉，嬲怒五十四的宋瑪莉亞仍不準時出現病牀前，把宋字加回在口唇邊，是怕以後十分鐘都噏不出她姓甚名誰。上半生我都堅拒肉體被割開，怕洩咗道氣，對麻醉一樣逃避，起碼見過三條友落藥之後，永不醒過來，就算今日要推入去個隧道焗爐做吓磁力共振，我手指也震到彈琴。跟手逼自己催眠，瞓覺到入夜，發到的夢，都有娛樂成分，包括兩個大眼女童，一個幾十年前的二女伊沙包，一個是十一個月大，有個宋字的瑪莉亞的ＢＢ，兩個俄羅斯馬戲團空中飛人，跳下來我雙臂接住，我寶刀未老，把雙姝放在兩肩，全場喝釆。我又夢見哎吔家姊剝橙餵我食，像含羞少女，訴說難逃大馬拿督的苦纏，心如被大笨象碰撞，七十幾歲才再作第四嫁，對現在正值要甩難的親生蓋紀大班，是否攞景贈興……我想一輪嘴去為她打氣壯膽，卻因時間關係，又去發另一個夢。事後竟得宋阿嫲更正，根本哎吔家姊在電話將蜜運纏身跟我一五一十盡訴，我卻偷盜版權在夢境再播一次，還有橙食。
戴了深啡色的運動帽出院，與假髮幾可亂真，阿趙的手下早已搶先結帳，我例牌大安旨意，順口試探他們蓋老闆行蹤，一個二個詐作不知，演技有內斂有大斂，值得一讚。宋，一定要加個宋字，宋瑪莉亞鴐我車來接回青山未住暖過的新竇口。
「我收到SMS考到經紀牌啦。」
「唔好開心成咁，而家啲人好叻喺手機整蠱人㗎。」
「唔係你整蠱我就得喇。」
「去飲茶先吖，好唔好阿ＢＢ？」
「返咗去先喇，我本來放低ＢＢ喺你度，佢又係都要跟埋嚟。」
「哼，證明你口疏，你點可能掉低佢一個人喺我嗰度？ＢＢ，穿佢煲！」
大眼妺也懂得咭咭聲笑，就在我扭身向嬰兒座再逗她的時候，就在右手面有飛車挨過來，兩母女都處變不驚，我就鼻哥窿冇肉，退化變成鬼揸的呼叫：「我唔去醫院，我唔入醫院！」
「你做乜嘢唧，冇事冇事，你𠝹損咗隻手指之嘛……」
結果飆車人在我恢復常性想爆老粗前，已為那條三吋花痕賠五百現金了事。大眼ＢＢ只當坐完過山車，打個呵欠。
入門前我認為那個賣關子的，一定是回歸的哎吔家姊，不出所料，我更先聲奪人。
「快啲嫁俾阿拿督喇，兩個加埋都百五歲咯，賺多一日得一日吖嘛。」
「衰細佬，跌你唔死就咁口花。」
「快啲叫阿妺妺喇。」
我老點大眼妺，但她的記憶系統比我這個傷兵高一個馬位，不被我煽動，發出高呼：「婆波……」
「乖，阿壞Uncle教壞我哋ＢＢ，我同你打佢，阿Maria呢？」
「頭先又俾人架車揩親，佢擺架車去check 吓先……」
「你都真係要打醒十二個精神，枱面道符我同你作福㗎，快啲放入銀包……ＢＢ妹，婆婆買咗條鏈仔俾你。」
那塊隨家姊在大馬坐飛機回來，黃擒擒作福的符，平時我已捩手沖落廁所。今日……或者倒數這個禮拜……講到尾……都已經兩鑊……執返條命。