飛車最大的挑戰，是食極牛肉乾，都未扣分停牌。今晚星期日趕回巨宅，跟上天那些九流的編劇鬥快，一口氣浸甩皮的熱水浴，撲上牀逝世。想創我的心，臨埋門居然收到Ben少爺的補習姐姐有我手機將我攔截，話說在山下的小巴站，望截到我託我帶一底大菜糕回去，事因上次在車廂聽聞，我和太子一老一嫩對絕種的大菜糕有遐想的欲念。怕者新世紀不流行天火焚城，就懲罰全個地球衰十年，益我倘若未瓜柴，判我與草根和衷共濟。
真的打個突，早前在屯門與外婆瑪莉亞與她的大眼乖孫吻別，不足一小時，包括做大菜糕物流水客，入到橫廳休息室，即見到這裏的王室成員，花旦王瑪莉亞外婆與外孫Benedict在冇大冇細，太子根本是內奸通水，一手已搶過大菜糕飛身上樓，哎吔家姊在重溫她的殘片。最幻海奇情的是，我見足了成日的黑圓領無袖黑裙，似借屍還魂的穿了在她身上，唯一識別是多了串珠鏈。
「細佬，邊個人對手同你按摩按成日呀？搵極你都唔蘇我吓。」
「呢套要猛打北派㗎？」
「我幾十年冇睇過呢套做梁紅玉嘅，上次去大馬，我啲徒弟幾有心呀，俾佢地喺越南搵到呀，掠水呀，仲貴過古玩呀……」
「你督督撐……點解你哋去打仗唱英文歌嘅？」
「我哋填咗廣東話啦嘛，你如果認得呢兩個，後來都紅咗，嗰陣都係做我二幫……」
「隻歌好熟，你哋攞人哋啲歌話唱就唱，唔使俾版權嘅咩？」
「幾十年嚟都奉旨㗎喇，呢隻我哋係去倫敦嗰陣，猛睇人哋啲音樂劇偷師，套乜嘢《窈窕淑女》裏頭，個教授改造個老土嘅賣花妺……」
「我細個响戲院有睇過，My Fair Lady，記得啦，呢隻叫……個教授突然聽到個賣花女講嘢粒粒字正腔圓，……係……The rain……In Spain……Stays mainly in the plain!……嘩？人哋on the plain，你哋就猛唱『共帶兵，共帶兵』，咁都得？」
「填得好呀，又易上口，電台揀呢隻成日播㖭呀，喂，趁我記得，你走唔甩，月底佢哋又請我過去慈善大匯演，齋放呢套出土嘢唔夠噱頭喎，話我萬能喎，叫我乜嘢文嘅歌都唱吓……就唱呢隻原裝嘅英文歌！」
「啱晒你同你師弟阿乜天蕩拍住上喇。」
「唉，佢冇乜點讀過英文㗎，仲唔止，你嗰次，唔覺佢有隻腳墊好高鞋嘅咩，跌跛咗冇晒前途……佢好自卑……一於你喇……」
「咪搞！」
「你幫我練，你就做嗰個教授，我梗係做個賣花女喇，叫埋阿師弟嚟睇，佢睇睇吓就會恨做㗎咯，聽你唱啲英文聽得多，佢就識唸口簧㗎啦，等佢臨老做人有番啲信心吖嘛。」
「家姊，真係有你講冇我講。」
「嗱，我哋順便幾個一齊去玩吓，我介紹啲可以幫你翻身，但又好心地嘅人你識……你！哈！又可以帶你拍緊拖嗰個，同佢個ＢＢ一齊去玩吓，一舉三得呀。」
「家姊，你嚇死我，你請邊個私家偵探㗎？」
「總之，我講總之，我過俾阿師弟青山間屋，叫佢唔收租俾你住，住到你唔住為止。嚟，教我點唱啲英文歌詞先。」
震撼的程度，今晚瞓得着，先至奇。