作為破產傷兵的休養期，手中有三條煙士，新發財汽水蓋前世欠我來還債，中西合璧的蓋老太慈善旦后瑪莉亞視我為親弟，萬千寵愛發育完善的太子卻待我如親信的西賓。二打六看風駛𢃇的三條外傭，開始也知我非同小可。於是，再三肯定，對我明暗皆存敵意的蓋仔老婆馮素裘，多年來先離間我瓜柴的老婆，再唆擺大眼雞二女擅自送上門，嫁去與我同行如敵國的奸細，連蓋仔救我於水火，也被這個「逢球掃」阻撓過幾次。爛佬怕潑婦，但我雖則在英倫留學奉旨捧蛋，但傳染了巴之閉的血皇冠玫瑰戰爭的口水尾細菌，區區一套本地清裝宮廷劇，大結局她早已被賜毒酒懸樑。
本來老瑪哎吔家姊博亂，因為旅遊大馬勞損，又不肯割愛缺席今晚領事歡宴拿督過港的舞會，硬要我陪她操練幾下倒豎葱，幾乎人頭落地的探戈招牌舞姿，我嚇到鼻哥窿冇肉，估不到我拍馬也追不上，她保持七十幾仍勤練北派，寶刀未老。正在思量計仔甩身同赴舞會，細佬變舞男，不少閒人更會將我起底，她已致電專供西服之上海師傅班來size 48的突斯吐，心想難逃一劫時，敵方大少奶之菲傭闖進後宮，半頒聖旨的廣東話，十分招積的聲氣定是女老細的用語，叫我「出去偏廳一齊飲下午茶，唔使咁企理……」，就算我不火滾，聽眾還有德高望重的家姑，卻當耳邊風。
「細佬唔使擒擒青出去，同我練多一次呢個向後昂，乜嘢出去呀？我哋監躉咩？出去邊度呀？細佬你著咗成套老西同我練舞，你咁樣出去，見官呀？你咪俾佢懶醒會錯意㖭呀。嚟喇，123……」「依動躀，唏。嘩，冇得頂阿家姊……放心，我特登換返套運動衫同踩對波鞋先至……『拙』去。」「我自己除低今晚套戰衣再練吓啲踢腿，驚你唔喺度，踩到裙腳撻死我呀。」「咁家姊你『拙』唔『拙』去呀？」「你『拙』先，有拿破崙就留返件俾我。」
進駐巨宅後，遇見逢掃球的時間和次數，珍貴過奧林匹克跑手。我故意插一枝煙仔在耳邊，谷一身做完gym的汗水和氣味「出」到一直都是永不留步的橫廳，蓋逢掃球一手接過菲傭出煙的茶，一手還在緊握手機，證明對這類人種，有三隻手也不算多，見到我的身世，面部肌肉無法再繃緊，相信注射肉毒桿菌爆棚的早已有代替的新科技。
「哎吔阿大伯先生阿易老細，撞到你真艱難，要你一早一晚咁辛苦，湊我哋Benedict返學放學，好彩係你咁錫佢咋。我話盡快請過個司機，佢話唔制呀……食件拿破崙喇……」我眈天望地，一手幾乎打瀉碟上茶杯，另一手無所事事，有勞雙腿放上梳化手柄，波鞋的確有散出狗屎氣味。
「咦？我哎吔家姊，你奶奶呢，話留返件拿破崙俾佢喎，乜得佢乜都知嘅？」這句撩事鬥非太溫文有禮，雷暴警告仍未掛起。
「啲工人話我知，尋晚個補習姐姐，係坐埋你哋架車一齊返嚟嗰喎，閙得少呀，咁都學是非過我知……」我老婆臨死之前說什麼也是這樣，得一個表情。「係吖嘛，個姐姐搭唔到Van仔喎，阿Benedict就乘機唔補習喎，咁點得呢，我話冇咗呢個姐姐，你將來就後悔咯，味監硬捉埋個姐姐返嚟，快啲食飯快啲開波囉！」「開乜嘢波呀？」「夜喇嘛，追返啲功課吖嘛，啲工人我唔話佢哋都唔得，成日細聲講大聲笑又唱歌，嘈到人哋點集中精神呢，我唔抵得頸，味去同佢地砰埋度門囉，咁先係波吖嘛，後來我仲入去問佢哋食咗飯後甜品未……唔怪得你都話我錫佢喇……」
支配不到五官的女主人，頸已洩露青筋，如這也不點到她的死穴，我就犧牲寸到痺的形象，放一個有聲的臭屁。