不幸中之大幸，以為昨日總不會是最後一次開車送Benedict到屯門上學，竟然醜嘅靈，還好應說的昨日已衝口而出。大幸是冚家不至於冇鞋挽屐走，一早哎吔家姊齊集我跟Ben仔到後欄她的總部聽候旨令。「阿Ben仔你阿爸俾人裝彈弓，好彩上咗機都落返機冇返嚟，前面大屋乜嘢都唔使恨，早就柄埋，你自己有乜濕星嘢唔捨得嘅，今朝早叫工人拎晒嚟我呢邊，阿細佬你有乜索性今日搬晒去青山，我叫你去住嗰間屋呢，你兜埋阿師弟去，密碼同車牌一樣1338，有乜唔順眼就叫佢執手尾。最遲一點鐘，呢度前面同後面劃清界線，大車房中間有度大閘連埋後山，我哋係自己人嘅全部撤退，前截死人塌樓一概唔關我哋事，公司阿趙一夫當關，佢早就幫阿蓋老闆部署到，冇嘢好驚。肚餓就食嘢先。」她真有代表作《梁紅玉殺敵共帶兵》的氣場，我則隨時會趁高興，來時落腳一身黑皮褸黑波鞋，大仔的手風琴，行軍的造型，房中二女的奈良名畫，早已是複製贗品，留下來扮若無其事。含着一口的少爺大膽發問：「婆婆，係味媽咪識搞掂佢自己㗎啦？」老人家來一個蹙眉的關目：「養大你都係抵嘅，細佬你睇吓我個仔生啲仔幾有良心，佢阿媽尋日湁一聲就飛走咗，精過鬼呀佢，正一係大難臨頭各自飛呀，哼……」「咁我要幾時飛呀？」「都係愈快愈好，費事啲衰人捉你出嚟審你，引你老竇現身，咁就手尾長。」「咁今日仲使唔使同你師弟兩個人唱熟隻《The Rain in Spain》呀？」「排，點解唔排呀，我乜都排晒呀，點半我去鑲返兩隻牙，三點約咗你個Maria同佢個ＢＢ飲茶，喺中環買隻公仔俾佢玩做見面禮嘛。」「咁我去咗青山，邊趕得切撲出撲入呀？」「咁就啱嘞，你中計嘞，你唔喺度，我哋兩個女人乜都傾得，我仲唔爆晒你啲嘢俾佢知，哈！」「Uncle，我都跟埋去青山得唔得呀？」「唔得，你想『除非』吖嘛，點都唔得！」「喂！你兩個唔好以為我唔知你講乜喎，下晝前欄後欄都人去樓空，你味冇王管囉，何必要咁遠水路去講拜拜呢，叫佢又整一底大菜糕嚟味得囉。」Ben仔得米，逃亡隊伍中，後生一族這組行動最令我心驚肉跳。
往青山的路途中，輪到師弟黃天蕩不停接聖旨。「阿師姐話，啲麻煩友如果真係會去突擊檢查，不如聽朝早我同佢同佢個孫都上機，我都嫌倉卒，原來佢成日都係為人哋諗好晒，佢知我人老冇寄託，早排大馬嗰邊有大戶開間藝術中心，監佢做顧問，佢就還價話……」「唏！佢郁吓堂眼眉我哋都知佢想點喇，佢想你代表佢喺嗰邊，教吓啲學生，又過吓日辰，係味咁吖？」「阿大伯哥，仲包食住，十四個月糧㖭呀，恨都恨唔到呀。所以佢驚有乜差池，就捉我早啲過去，落實件事喎，佢真係前世欠咗我咁……」「對我都係，所以佢唔慌唔係慈善旦后囉。」
這間青山舊屋已是七旬老叟，但一直租給外籍人士，殘而不廢。母女二人，不是，嫲女二人入黑前趕來八卦，窗台與天海對立，大眼ＢＢ手舞足蹈，經已夠皮。「你日頭帶埋個電腦嚟做嘢，味帶佢嚟喺度走嚟走去，又睇晒成個海，人都大得快啲。」「我驚佢開心得滯咋。」「你有冇啲好嘢講呀，家姊今日有啲乜嘢講呀？」「冇呃，買唔到公仔，買咗啲泳衣仔俾ＢＢ囉。咁你聽晚飛，有冇衫要洗呀？我今晚帶返去，聽日拎返嚟……」「是但喇，去到先算……」「你件皮褸都俾我焗吓佢喇，乜得你咁鍾意日日都揹住佢，個人未到我哋都聞到陣除呀，你自己知唔知？」「唔知……」