瑪莉亞近來奉旨剝削我臨瞓前，起碼半粒鐘，奉獻去附和她每日工作的成績，ＢＢ亦例牌倦極入睡。昏迷前，望着舊式建築的高樓底，靜到耳鳴，有任何奇難雜症頑疾，合上眼離開這個世界，也不過態。今晚出事，ＢＢ突然慢慢在她的牀上坐起來，姿勢不似仍要飲奶的年紀，無尖叫，無功架，一聲不響的流出大粒的眼淚，輪到我心寒。忘記關機的訊號，驚醒了同周公交際的瑪莉亞，紋風不動的，仍是ＢＢ。「係咪佢哋上飛機之前，有嘢叫我哋跟呀？……ＢＢ做乜起身呀？」 「 ……由得佢，我哋聽咗先……Howard呀？有乜要交帶呀？」我仍一心二用。「冇，不過我哋班機要遲啲至開得，話引擎有事要檢查，阿Pam擔心要搞好耐，怕你哋唔知乜事，大家傾緊，好唔好轉第二班機……」 「Hello， Auntie掛住喺機場仲猛買嘢俾ＢＢ呀，佢瞓咗唔好搞醒佢啦，阿Auntie仲問我知唔知有班機喺Heathrow呢度起飛，唔夠三分鐘就鏟番落地面，成架機百幾個人全部遇難呀……」 「喂，呢位女士，貪高興？仲講埋晒啲咁嘅嘢？一陣班機係我哋送條命上去。」 「1972年喎，我都未出世，點知咁大件事唧，Auntie嚟緊啦，佢反而唔係好棹忌……」 「佢呢世人乜嘢未見過，影吓佢，俾我同佢講……」就在此時，已被瑪莉亞過去呵護的ＢＢ，跳下來邊走邊跌，走到牀邊伸手要摸手機，哎吔家姊已出現畫面。「做乜ＢＢ咁夜都仲未瞓呀，呢啲嘢都係你㗎……」 「婆波……婆波……」索性放聲痛哭的ＢＢ，猛在搖頭。「儍ＢＢ，我夠掛住你，我好快返到嚟……」ＢＢ更亂跳耍手：「唔好呀……唔好呀……」大家都很詫異，「Maria，你湊阿ＢＢ去屙殊殊先喇。」 「老竇，你咪話學堂嗰個醫生同你講，暫時唔好俾ＢＢ去咁多農場嗰度，咁細個人仔，兩個月就發生兩次啲咁暴力同咁冇人格嘅事，大人遇到都會有精神上嘅後遺症。」 「所以我哋三個先至擒擒青要趕返嚟，唔使諗，一陣嗰班有排整，我哋就搭另外班機。」 「我哋係疏忽咗好多嘢……」 「唔好擔心，你哋到埗之前，我會搵另外啲方法去湊佢。」 我叫人唔好擔心，最擔心的，就是自己。而且南北戰爭一樣，是但一個答案都是賭局。ＢＢ不是魔鬼怪嬰，但她一而再再而三，如有神助，陪同我們擺脫困境，如果今次令三個疼愛的家人不登上這班機，真的是逃離一場空難，但等於分配給大家，從此一條不知所措的鎖匙。閉目養神極可為，我催促孝活將定期為ＢＢ開竅的功課傳給我代發辦，他們終於在三個小時後得以起程，居然令Ben仔，岳圖，黑炭，各自拍了給ＢＢ打氣的片段，Ben仔逢舞識跳，只差近日惡補踢躂，黑炭示範雙手合十單腳站立達十分鐘的瑜伽，婆波展覽十多份誘人的獎品，眾人向ＢＢ挑戰，只要人仔她掌握到所有項目的入門基本步，還不止這些獎勵，岳圖一起拍照的那隻小馬子，也只有四個月大，蓋Uncle會運送牠回來送給ＢＢ一齊長大……用他們回歸消耗的十五個鐘頭，我和瑪莉亞用盡分秒，為ＢＢ將噩夢遷移，她可以單腳站立，來數完廿六個字母，可以腳踏沖涼的小木屐亂跳踢躂有聲，她率先向小羊子通水，有一隻小馬子會回來做新朋友……她其實不是貪圖那些獎品，看得出，她開始懂得渴望孝活和Pam出現，她需要名正言順的父母。
