哎吔家姊是雜錦宗教信徒，不愧為聖母瑪利亞，也兼飾觀音大士。救人於水火，有板有眼有鋪排。成功移植她師弟黃天蕩進駐大馬，眨眼飽受當地名媛戲曲界受落，每次在手機毫無往日唉聲嘆氣，不知香港為何物。今日更真人開腔：「大伯先生，一陣子我俾條片你睇，我唱嗰隻幾十年前嘅粵語流行曲，上晒榜呀，下個月有個慈善籌款晚會，點名要我唱壓軸㖭呀，但班拿督太太團，話我肯用英文唱，就捐出多五十萬馬幣……」
「恭喜晒恭喜晒，你師姐實會一早就飛過嚟同你打氣，我就呢排好濕滯，一記唔起啲嘢，就忟憎到失禁，你話我嚟坐喺度睇你表演，睇睇吓瀨尿，幾失禮呢……」
「我唔信，你鬼馬，你一係幫我將隻歌譯英文，我叫佢哋鳴謝番你個名，你實譯得好盞鬼。」
「我中文唔叻，英文都好吔吔烏……」
「你睇咗我條片先喇……」
✽✽✽一枝竹會易折彎，幾枝竹一紮斷折難，孤掌莫恃倚，團結方可免禍患✽✽✽我照足黃天蕩勁多造手的片段，見一句譯一句，加上不少利物浦的俗語，半粒鐘就大功告成，連一碗牛筋麵也攤凍，當手機顯示他又再來電，我才醒起先前我是一口拒絕。
「我知你整鬼我，點會扱我電話，我真係要拜你三拜，頭先唔記得問你，你想唔想搬去近海嗰邊大啲嘅單位呀？」
「你想我搬，俾返間屋你？」
「唔係唔係，點敢，師姐打死我呀，因為今朝佢話，你幾廿年前有間別墅喺『聽濤邨』嗰邊，家吓個市跌，丟空咗一排，咁啱佢有個朋友買咗又想放，師姐話個人有興趣同我哋呢間對調喎，我話係味㗎，大我哋呢度三倍都唔止喎，咁大隻蛤乸……」
「我譯完你隻歌好頭痛，想瞌一陣……」
「師姐話個朋友你都識嗰喎，話晏啲車佢嚟探吓你。」
「我鍾意呢度，我唔想搬，你吟吓啲歌詞先，我瞓啦。」
「細佬，起吓身喇，我買咗件皮褸俾你，個人喺樓下花園仔等你呀，起身著返條褲喇，我出去買啲嘢，轉頭就返嚟……」哎吔家姊熬醒我時，已是手機短訊雄霸畫面，「青山你有乜嘢買？邊個嚟㗎？」愈叫愈走，有點反常。
跌崩頭之後，我連第六感都喪失了。煙仔沒傍身就落樓。一個麻包袋的女人，見到我，可能未見到我，就流出準備好的眼淚，想過來攬我，又退後兩步。「唔緊要，我唔會嗌非禮。」反正過了廿多年燒豬兩免的日子。撲過來是鬆泡泡的三圍，囗水加鼻涕，我雙手不忍伸出去。上世紀那個等我晚晚放工，在高空飛下來的「醫沙包」，肉騰騰又結實，是個襟玩的大眼公仔。
「佢哋話，你跌落幾十級樓梯。」
「邊個佢哋？八級啫，我一路跌一路有數住。」
「我執嘢見到我結婚啲相，見到大哥，而家至覺，佢同你後生真係好似……」
「我返上去食牛腩麵。」
「我陪你……」
「我一個人自己食，你响度等Auntie Maria返嚟。」