拿督夫人，我們五體投地的哎吔家姊，永遠不記仇，朝早反面，不到中午都可以跟對方共膳，我和孝活，瑪莉亞和新改名孫女BeatriceＢＢ妺，三大一小已得到永遠特赦令，但恨錯難返的天蕩師弟，數手指已是昂然踏入冷藏第二周。
「嗱。阿仔阿孝活，返到去挪威，你幾忙都要𥄫實你個老竇，佢喺南半球呢度都仲牙擦擦，去到佢騰雞㗎啦！」「Auntie Maria，我哋第一站搵到間屋側邊啲水好淺，Daddy可以勤啲游水，等於勤啲做多啲物理治療。」「游還游，你小心攝親呀……」後生那位瑪莉亞宋，皺起兩條電車路來苦口婆心。「好喇阿Howard，你簽張生死約，保證我條屍原裝運到返嚟。」「掌過你把嘴呀。」「阿Mary姐，我哋要佢日日都用手機報平安呀。」「日日都係三幅被，我換幾套衫拍定幾條片，橫掂都係嗰幾句嘢。」「放心放心，我上身，佢後生嗰陣好叻執生……」「而家呢？」「而家都係！」「你兩仔爺好自為知喇，嗱，我要知兩件事，首先，阿仔你返到去奧斯陸，係要搞掂嗰基本同呢度合併嘅林審嘢，我對你放心，但，我响吉隆坡呢邊同你做守龍門，有樣嘢好蹺蹊嘅……家吓個個都喺度，不妨俾我哋知道……你同阿太子女有冇拍吓拖咁呀？」孝活很少打個突，將咖啡呷盡，「你問住第樣先，俾我諗一諗。」查實我同瑪莉亞宋伸頸以待，低頭等答案。「好呃，有定冇，場波就唔同踢法。因為我知道嘅係寫包單，太子女响英國讀書嗰陣，同個鬼妺行得好埋，呢邊屋企又驚又震晒，十萬火急搵人去捉佢返嚟，阿太子女同個鬼妹跳橋，唔知係邊條橋呀吓，終於兩個話就話救得返，但有一個就從此唔見咗，我哋而家見到個太子女，一年前返到嚟都唔見咗一排，聽講佢老竇老母監佢睇咗大半年心理醫生，但而家邊度有人當呢種係病，人人再見返佢，佢都係笑口噬噬，見親男人，都拋晒生藕……」「家姊，你係咪响FBI都有份兼職㗎？」「我淨係想問阿孝活仔，你知唔知呢啲事，你鍾意佢想追佢，冇蝕底，佢屋企多謝你，個女仔就算詐諦俾你追，佢屋企一定多謝你救咗佢成家……」「蓋Auntie，我冇追佢，佢亦都冇詐諦追我，冇啲咁戲劇性嘅事，我真係好急，要去一去廁所。」「唔好意思，我都要去一去，好快返嚟。」兩人分別借尿遁，我也無癮發表偉論，「佢兩個唔喺度仲啱，細佬，早兩晚你個Maria喺你房唔扯，唔關我事，我係驚你兩個加埋百幾歲，就大安旨意，真係手尾長嗰陣，你兩個點算？」「唔會……」「點解唔會？」「我紮咗。」「點解我唔知㗎！」「我紮咗要話俾你知，有利市要封俾我呀？人哋跳橋，人哋扮鍾意番男人你都知咯。」「你唔似吖嘛……」「唔似乜嘢呀？男人有紮冇紮有個樣嘅咩？」「打得少呀你……你兩仔爺聽晚夜機，成十八粒鐘，你唔好同阿ＢＢ拜拜，你搞喊咗佢，我哋兩個女人就成晚唔使瞓……」「你俾咁多時間我哋幾個，你俾番啲你自己……」家姊九秒九就塌檔，「我仲有乜好望，個仔要成世被迫走路，個孫都要分頭去讀書，呢個伯爺婆，臨老以為好醜都搵到個真心嘅，點知阿拿督佢真心到，情願早啲俾晒所有嘅嘢過我，然後就莎翁喇拿，行先一步……我淨係想見到ＢＢ好，見到佢大個女，我實冇命見到，你都未必有命見到，所以我哋要俾心機見一日過一日……」
酒店大堂上下的人，對這些情境，詐作不知，瑪莉亞和孝活早已回來，不動聲色。