幾十年來，阿爺教落，眼眉跳個不停，左吉右凶，信不信其次，十次九次中。起碼是某某追尋我下落，又或有人想打我一鑊。入夜仍然塞車，穿着哎吔家姊班來Miller兄弟的突斯吐，每個部位都走了樣，著錯緊身衣一樣，手機塞入心口更加爆棚，兩次來電留言也闊佬懶理，眼眉趁高興愈跳愈勁。
「喂細佬呢截抄硬㗎，你又衝紅燈又剩，做乜鬼呀你？你係味話就話冇事，但其實你都好想知你個女，同我新抱講咗啲乜嘢？」「話知……我著唔到48㗎啦，呢排我食共瞓都冇定時，賤肉橫生呀，一陣去到，你大把老友霸住同你跳，戥腳都唔使我呀……」「嗱，你俾阿家姊八卦，我都好恨聽吓我新抱錄咗啲乜嘢，你俾個手機我，一齊聽好唔好？」「拎去使，你用耳塞聽，我唔聽都得㗎……」「咦，兩次喎，有次係Maria喎，唔係我呢個Maria喎……使唔使聽呀？」「唔使唔使，我……都唔係好知係邊個，你聽咗你新抱噏啲乜先喇……」
「阿大伯先生，我諗返起都想喊，你個女阿Isabelle，呢排原來有去睇我哋個老友，個心理醫生阿Johnson呢，我點忍得住詐唔知唧，尋晚借啲意，提早同佢做生日，兩個飲大咗，佢又嘔又喊，我未見過佢咁，送佢返屋企，佢唔理架車我個司機都聽到，嚇到我，你發夢都估唔到，佢話，當陣之所以嫁呢個老公，係因為呢個男人似十足自己爹哋，鋪性格又似，用力攬佢又似，個人陣除又似，自從自己一變咗大人，自己個爹哋都變咗第個人咁樣，我聽到兩個攬住嘁到唔曉收聲……」
哎吔家姊按停了手機，無聲無氣，我也想不出應該有何反應，也沒有拿煙出來過兩棟。直至到達山頂領事的夜宴，兩人像沒有聽過，發生過，講過，任何事，手挽手，步入另一個星球。
對她來說，舊雨多過新知，不幸的是，最佳拍檔大馬拿督腰患復發，無法雙雙展示舞藝功架，我在萬紅叢中一點綠，與她似陌路相逢一拍即合的男女，將英美阿根廷的探戈共冶一爐，南拳北腿，大開大合，動作俐落。充當了幾小時的人肉機器，貼面也沒有說過一句話。
「阿拿督話今晚冇本事同我跳到舞，都唔知仲有冇咁嘅一日，佢話同我再去食宵夜遊吓車河，佢會送我返去……細佬……你扯先喇……頭先你仲有一個電話未聽……」
我沒有良心的時候，就真的很沒有良心，猛跳舞時眼眉都猛在跳，其他人以為我在放電。未開車電話就響。「阿易老闆唔好意思，我講唔講得呀，我個ＢＢ女呢，自從佢爬上櫃頂你叫佢跳落嚟，你接住佢，佢味開心得好緊要嘅……點知你走咗之後，我一唔睇實佢，佢就又試爬上櫃頂，我都唔知佢點樣有本事爬到上去，佢以為佢喺上面，你就會出現………」「咁神奇？我有應承會嚟帶你哋去游水，佢好似識聽……」「但我頭先話佢知，我搵唔到你，佢嘟長嘴向住我跳落嚟，點知撼到兩個魂精都流晒血……」「使唔使去醫院呀？」「佢咁大個都未出過門口，我唔想佢第一次出街就去醫院。我同佢黐咗塊Hello Kitty 膠布。」「咁你有冇黐吖？」「未……」「咁你等我嚟同你黐喇。」「咁夜？」「係！」