無意在酒店大堂高椅背梳化，偷聽到孝活再碰上集團太子女，原來這位Pamila，我又改她的花名做「棚尾拉箱」，表面家族顯貴，但風光後面也有生母被逐的身世。我自從臨老破產，不怕早死早着，偏偏身邊貢出一個二個貴人奇人，甚至愛人親人，排隊而來。混迹江湖飆升的蓋大亨，將火海中的我，不停灌水，話說向我報往日之恩，自己又被突發通緝潛逃，浪迹海外。其母南洋花旦王玉蘭馨，刁鑽又心地好，三扒兩撥就當正我哎吔細佬，扶我堂堂正正擔高頭做人，重整儲糧。同期又遇上自稱「劏豬凳」的宋瑪利亞，知人眉頭眼額的半百靚人，卻有個佗手褦腳的嬰兒，往日的我，無意上牀，頂多食多兩餐晏仔，出奇地令我每日都記掛的一大一細，變成親人一樣。相見爭如不見的易孝活，又突然回歸與我這個老竇，兩個都自動波變成互相打氣的父子兵……好戲連場，一日之間又彈出阿棚尾拉箱小姐看中我乖仔擔屎唔偷食，求他裝作二人行埋，則可出雙入對，掩目為主，飛來飛去，就可去倫敦拯救她生母一直被豪門不停逼迫的慘事。聽落近日此單最老土，但這個二千後的世界，人人都對這種快來快去贏得無限好奇。我的傳奇，比起這些包圍我的乜人物人，我的未來日子，經已平凡到極，為免節外生枝，我應該盡快跳過一切高潮迭起的三世書絕交，衝去找瑪莉亞啜她一大啖，再咬ＢＢ的肥手。一企起身，孝活就原路折回來大堂這邊而來。
「做乜你仲喺度？蓋Auntie佢哋幾個搵唔到你，返晒上酒店房啦。」
「咁你做乜又走出嚟？」
「櫃枱有message俾我，話有快遞……係阿蓋Uncle唔知點解，唔寄俾你，寄俾我，晤知點解呢？」
「乜嘢嚟㗎？」
「係佢隻手指囉。」「吓？」
「大劑，咁……手指點過到海關……唔好扐出嚟住……」
「UBS呀，電腦手指呀？佢有張紙條，叫我哋睇咗先，唔好俾佢媽咪知住，佢估我識點樣同佢搵笪地方，你視像同佢傾偈……」
「唔慌好嘢！」
「你等我幫你跟喇！」
「唔怪得我用手機打親電話俾佢都冇人聽。」
「唔好再打俾佢啦，我試吓問阿Pamila可唔可以幫個忙。」
「你咁信得佢過？」
「佢夠信得我過，你頭先坐得咁近，實聽到晒我同佢講咗啲乜嘢。」
「我更年期，唔知你哋講咗乜……」
「唔好咁喇，Pamila已經信晒我哋成家人。你錫多啲Maria姐姐喇，佢都就嚟係我嘅阿媽咯，佢個人肯乜都扮唔知，其實睇得出佢以為我哋始終仲當佢係外人，去𠱁吓佢喇。」
我受教，我只不過……我為何還要「只不過」，趁未註冊，我逼未來第二任老婆，趁夕陽未西下，一家三口落泳池，度一個教ＢＢ人仔學游水的蜜月。缺陷是ＢＢ早已得到哎吔家姊為她儲備的棗紅蝴蝶困身泳衣，晚裝一樣，入水困難。我一見到拿督夫人和棚尾拉箱兩人已先來一步在啜飲，觀禮兼密斟。我與宋瑪莉亞已心有默契，我將ＢＢ放上膊頭飛奔衝去池邊，令人仔又害怕又興奮尖叫，看着我這對神化儷人跳塘自盡，又重新冒出頭來猛招手引誘，ＢＢ退兩步行前一步，我沿用第一次在她家中舉高雙臂叫她跳下來，她有不滅的回憶，就勇闖飛降我身上。超乎我們的野心，不足一小時，ＢＢ已膽敢浸頭入水，踢手踢腳，榮登最勇敢的神童。我們也潛水護航，兼滿嘴池水的濕吻慶祝。