一幕未來女婿登門拜訪的戲碼，演到解樹仁（林子祥）完成「任務」，原來尚未落幕。井不揚波的三口之家一下子熱鬧起來，縱然主客對於箇中喜氣皆感莫名。情節來到客人告辭，主人為他撳亮樓梯燈，一切理當回復原狀，後面卻還有遲來好戲。
未來岳母的婉嫻媽媽（黃曼梨）那「好聲行呀」話音才落，這隻手關上門，那隻手已把樓梯燈按熄。又在回過神來猛然想到：「哎吔，唔知落到樓下未添！」隨即重新把燈掣撳着。一個小動作，已把這家人的習慣、個性，以至女兒嫁後的端倪顯露無遺—不能說是小器，可是階級屬性最易見諸日常生活。省電的背後，有着捉襟見肘的陰影。《輪流傳》由一九五八年說起，香港還在艱辛歲月中泅游，巧婦的本能反應，乍看如喜劇般瑣碎，其實反映生存的沉重。
然後是和爸爸（陳有后），女兒（黃韻詩）聚在厚禮前展開的「家庭會議」。媽媽：「點算呀？我哋要送番啲咩俾人先啱規矩呢？」爸爸：「千祈唔好送月餅，人哋成間嘉興糖果公司，唔送得月餅㗎！」女兒：「係呀，人哋以為你原裝送番轉頭添呀！」媽媽：「係噃，唔買得第二間㗎噃。咁咪即係落人哋面，話第二間啲月餅好食過佢哋嗰間？」
女兒靈機一觸：「媽呀媽，你蒸糕咪好好手勢嘅，你蒸番幾底糕，整得好好睇睇，送番過去咪得囉。」媽媽翻起白眼：「唓！你估過年咩，八月節邊有人蒸糕㗎啫，唔得嘅！」爸爸也亮起紅燈：「喂喂喂，佢哋係上海人嚟噃，外江佬最緊要講排場規矩，如果我哋唔送番啲禮俾人呀，盞俾人哋話柄㗎咋！」媽被爸爸一言驚醒：「哎呀，至衰我懶懶閒㗎嘞，阿玉珠話四妗有幅暹羅綾俾我，我見無幾可着就唔去攞啦。唔得！我聽朝一早去攞番，睇吓趕唔趕切做至得！」媽媽脫了線，女兒的風箏也不知吹到哪裏去：「媽呀媽，啲林柿食唔食得呀？」招來媽媽的微詞：「食喎，你又係嘅，事前就聲都唔聲吓，人哋上嚟要話聲俾我哋知先得㗎嘛。」女兒立刻喊冤：「我唔知㗎，我都唔知佢上嚟做咩！」媽媽遂把「不是」轉移到爸爸頭上：「你呀！第時唔好響個廳度打出個大髀添呀，人哋會失驚無神撞上嚟㗎！」爸爸倒不介懷：「有咩相干呢，我而家去除番條長褲添呀！」似父莫若女：「我都去換咗條裙。」留下媽媽自嘆：「霎時間你都咪話，人哋就一表人才，我哋個女就傻傻更更，唔好失禮人哋添呀！」
最後一句，畫龍點睛，在那樣的時代和社會，「高攀」心理已播下日後宅男宅女難偕白首的種子。這一齣「送禮」，預告的是「一場歡喜」。