曾江最新打破的紀錄，是他生前所做的訪談，這一周來讓「音容宛在」四字再也活靈活現不過。
主持人問他：「你覺得自己多大了？」他如實奉告，但不是沒有寓意：「四個小生去旅行前，五十歲，回來後，八十歲。」出這一趟遠門，原是為了接一個老人歸來。
男人，在鏡頭前從來愈老愈可愛，何況，比起年輕的自己，他更有資格把「嗒」字放在嘴邊？「佢俾咗個劇本你，你今晚睇咗，個演出嘅質素就係唔同啦嘛——如果你諗，唔諗就梗係啦，你背熟對白ok啦，無問題啦，但係你嗒一嗒之後，個味可以咁㗎喎！」
對自己的表現設下高要求的標竿，怕不怕換來難相處的「美名」？他也是一句令問者語塞：「呢場戲我一百分，你零分，好睇咩？」有做人不夠圓融之嫌？「唔係寸得起，係我敢寸。」有語錄為證：「我哋唔係無學spelling，係學thinking，學analyse嘢。」例子如下：「廿二歲嘅女仔，佢寫個咁嘅劇本出嚟，得咩？當然有人好有天分……但係有幾個呢？」
演戲早已不是為了生計，何況練就了藝高人膽大？「我可以應付飛紙仔，但係我鍾意有劇本，我鍾意做功課，我鍾意睇深啲個劇本。」面對演出的對手力有不逮，他也不是光有罵，有時也心生感慨：「做個人都唔識，做咩演員？」
做人，便是搞懂自己是誰，明白自己要的是什麼。「無一樣嘢可以令我咁努力玩到A，我情願全部B，我知道自己係甲組尾、乙組頭，運動、畫嘢，讀書又係。做人唔係，做人就丙組。有啲人做一樣嘢就無得彈，其他嘢佢咩都唔識，咁有鬼用？我唔鍾意做呢種人。」
角色呢？少俠、公子、型男，曾勾留萬千迷妹迷弟的目光，事過境遷：「到咗我哋咁樣（年紀），一定好typecast（定型），大有錢佬、黑幫大佬，角色設定已經一樣，你點可以一樣？」更高難度在於，「我哋响戲佔嘅時間唔係好多，但响有限度嘅時間尋找不同，係好困難，好挑戰，好玩好多。」不忘補充：「不同唔一定正確，但今時今日可以afford唔啱，但唔係個個可以afford唔啱。可以唔啱，好奢侈。」
連搭錯車也是。「我好想搵啲新嘅嘢，去到某條路我知道落車搵個站，今次落錯車啦，但係無緊要嘅，行吓啦，但行對我唔容易，我有痛風，我都盡量去行，享受痛風嘅痛。」
但有一種痛不是說接受便接受，母親中風，他到美國伴陪，生活的各種不便還不是對他的致命一擊，某日她坐在輪椅上看着兒子走來，「佢一見到我，叫我老竇個名，我……最有感覺，唔講難過唔難過。」
示弱不是曾江的本色，即便在愛情前。「我怕老婆，但我是霸王，我尊重她，但我要她聽我的。」對主持人如是說。