白髮老翁口啣煙斗在讀報。
身旁妙齡女子哭哭啼啼。
「又喊咩嘢呀？咩事呀？」老翁轉頭問。
女子嘟嘴：「一日都係你個好女婿啦。」
老翁：「佢咪幾好。」
女子：「好喎？今日朝頭早，一早起身鬼咁風騷，就錫咗我哋工人蔡姐一啖。」老翁：「咁好閒啫。」女郎：「好閒呀？仲有呀，落街我又見到佢錫咗阿李姑娘一啖。」老翁：「好閒啫。」女郎：「好閒呀？仲有呀，今日佢返嚟，見到佢響街口錫咗阿賣菜妹一啖。」，「好閒啫。」，「好閒，成日都好閒好閒，咁要我點做呀，老竇？」，老翁：「咁你留低響屋企，等佢返嚟，遲早輪到你啦！」
罐頭笑聲爆響。
怨婦是「嘉禾公主」苗可秀，不懂女兒心的是吳耀漢。時維一九七九年，吳耀漢正值男人四十，本人黑髮又密又亮，為配合老竇「角色」才戴上灰白假髮。假如上述一段對話沒有在「老竇」說罷「遲早輪到你」時引你發噱，俗謂gag位，亦即笑點之所在，便不是台詞，而是吳耀漢那頂假髮有幾假而產生的詼諧效果了。
笑點的強弱，在於「搞gag」如何「搞」。下面又是一個例子：
老公對廚房裏的老婆下「哀的美敦書」：「咩話，仲要成個鐘頭先煮得好呀？唉，算喇，我自己出去食喇！」 傳來老婆的求情：「唉，俾多我一分鐘呀？」
老公一聽，「哦？忽然間一分鐘又搞得掂呀？」
但見老婆邊脫圍裙，邊走到客廳裏來：「唉，咁你都要等埋我，換咗衫，同你一齊出去食㗎嘛。」
罐頭笑聲再度爆響。
第三段在同一晚節目裏上演的，是牀邊的老婆不斷吟沉牀上大被冚頭的老公。先是老婆聽到睡房外有怪聲，懷疑小偷上門，「你聽唔聽到我講嘢啫？我問你閂咗鐵閘未呀？」老公憤然伸出頭來：「除咗你把口，咩都閂咗！」繼而，老婆又吟老公「依家（小偷）入屋呀，你估喺街呀？喺街都話驚呀，自己間屋嚟㗎，有咩好驚呀，咁鬼細膽，細膽鬼細膽鬼……」老公一彈而起：「我有膽呀，一早同你離咗婚啦！」
罐頭笑聲三次爆響。
前一段的老婆是金霏，後一段是盧宛茵，老公們皆由吳耀漢包辦。前者意圖振夫綱，後者反轉獅吼記，雖說擺明博君一粲，「笑點」也是無可奈何多於放開懷抱。
同一集前後三個gag都以琴瑟不調反映為人老公之不易，屬無意抑或有心？錯的都是老婆，以當年性別意識與政治正確尚未抬頭的風氣來看，「無添加」演出的吳耀漢，正好讓「老公們」往他身上投射自己的現實。
同期喜劇男演員中，許冠文還是要「演」才像「普通人」，吳卻勝在有鬚不用吹，有眼不必瞪，便已反映男人的可憫可悲。
是否好笑，已是其次。