Advertisement
趙榮德.升學有道

趙榮德:做棵樹

專欄
2022.06.17
27
撰文:趙榮德

694ec539-762e-49d9-9cfc-33cc34998cb4

「媽咪,我想做王子,唔想三年都做棵樹!」

有報章大字標題報道「疫情移民潮雙重夾擊,中小幼流失逾三萬學生」,移民潮其中一個原因是港人醒目、反應快,一聞到燶味便什麼都不理,立即走,對家人將來會有何影響,一概置諸腦後。他們以為移民去澳洲,就像由將軍澳搬去九龍塘那麽簡單。事實上移民可以是一髮動全身的。以下這個真實澳洲移民故事話俾我哋聽,輕率移民可以影響下一代。

話說在喇沙教書時,有一次喇沙學生會校報派一位負責人Paul來訪問我。在訪問我之前,Paul在單行紙寫上一些以下訪問資料:我的中文名字、時間、日期及訪問的地點等。我望到他那些橫七豎八、如張天師畫符的字體有些奇怪,心想,我們中六學生怎會寫一手這樣糟糕的字?

「嘩,Paul,你的中文字寫到左搖右擺,喺喇沙讀咗六年書點解唔練吓啲字?」

「趙sir,我都練咗一段時間,我的字最靚都係咁㗎喇!」

「 如果你用正確方法練,你的字可以寫得好好多!而家呢手字,尚需一番努力才可達到靚呢個標準。」

「其實我唔知道乜嘢叫寫得靚。因為我係喺澳洲出世。一九九七年嗰陣時,我爸爸媽媽一來驚局勢不穩陣以及前途不明朗,又睇到好多朋友移民,佢哋就諗都唔諗,同朋友移民去澳洲。因此我係喺澳洲出世嘅。」

「哦,因為你喺澳洲出世、生活、讀書,所以輕視中文,重視英文。」

「我爸爸媽媽一路諗住喺澳洲長住,所以冇理到我嘅中文,我中文講還好,寫就唔得咯。」

「你在澳洲讀書讀得開心嗎?」

「麻麻哋啦!不過有一件事到依家我都唔開心,就係在澳洲嗰間小學做話劇;由小一至小三,三年都要做一棵樹。我讀嗰間澳洲小學每年都有一次話劇表演,而我因為生得比較高,所以第一年小一被老師選造一棵樹,由頭到尾喺台上唔出聲兼唔郁得。」

「咁咪好悶?其他同學咁點呀?」

「好悶!其他同學有啲做王子,有啲做公主,有啲做大臣,有啲做平民,佢哋可以喺台上走來走去,又講又跳好開心,而我呢棵樹,只可以喺台上企足一個鐘頭,一句對白都冇,所以又悶又攰。」

「你小一在台上做棵樹,小二小三有冇變番做人?」我問。

「我都以為可以做番人,誰知小二同埋小三,仍然係要做棵樹。我爸爸媽媽曾經向學校反映,問學校是否可以讓我做王子,但校方話我做樹最好,企喺台上好淡定好安靜,唔係人人做得到,所以特別選我做呢個角色。其實邊度係!我爸爸媽媽知道,學校應該係歧視中國人就真嘅,如果繼續係咁,我要做棵樹做足六年。想到呢度,爸爸同埋媽媽為咗我嘅前途,毅然回流返嚟香港。」

「回流返嚟香港你搵到學校嗎?你在澳洲冇中文成績喎?」

「係呀,香港十間有九間小學見我冇讀過中文,全部都唔收。好在有一間唔計較,呢間叫做保良局陳守仁小學,見我英文好收咗我,我由小四開始讀到小六。中一超好運,俾我考到入喇沙,我就係咁喺呢度讀咗六年,用盡九牛二虎之力讀好中文,但我啲字寫嚟寫去都冇進步。」

「原來如此,其實你可以到書局買些教人寫硬筆字的字帖,每一日臨摹一頁或寫一頁,寫得一年半載便有成效了!」

「原來有硬筆字的字帖,我一路都唔知,真係要去書局買一本來練。」

「咁,你有信心考好今年DSE嘅中文科?」

「我有讀書,我只係驚我嗰啲東歪西斜的字體累事。不過,我會盡力。」

在此奉勸家長在準備移民前要有全盤計劃,因為如果「人走你又走」,一啲計劃都無,有時會連累子女也不知。

莫文蔚 星級企業大獎2020 陳卓賢
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹