Advertisement
趙榮德.升學有道

趙榮德:與子女做個Time schedule

專欄
2021.05.15
29
撰文:趙榮德

2740chiu

從小六升上中一的適應準備,第一是學好英文,上周已教家長用「朗讀神功」。如果啲仔女天天做半小時,六個月開始會見到成效。除了英文,還要改變仔女嘅心態,因為從小六升上中一,小朋友會有個 paradigm shift「範式大轉移」。以下為本人和「新手」家長的傾談內容,有興趣家長不宜錯過。

趙為本人    家為「新手」家長

家:除咗英文,First Former(中一仔)仲要做怎樣嘅適應﹖

趙:佢要做身份上嘅適應 : 從小六到中一,你從小學嘅大哥哥突然變身做中學嘅小弟弟,喺小學人人要聽佢話,喺中學佢要聽所有人話,自我形象縮到好似粒芝麻咁細。我試過喺喇沙教第二年做中一班主任,有一個外來嘅學生舉手問我可否去洗手間,我說可以,但該學生竟然問:「Sir,學校太大,唔知廁所喺邊度,可以帶我去嗎﹖我惟有叫班長帶佢去。跟住,另一個學生舉手問:「May I go to the washroom ?」我答,「Go ahead!」佢竟然面部作出痛苦的表情,我用中文問:「 點解你唔去,你忍得咁辛苦?」他竟然答:「你頭先話go ahead『 去你個頭』,我唔敢去﹗」全班大笑;我解釋go ahead 係「立即去」,佢聽完便一陣煙咁消失於課室中。以上兩個片段顯示中一仔升上中學時「對自己溝通能力有懷疑,解決困難能力冇信心」的心態。但係家長卻唔係咁樣諗﹗

家:係呀,我哋做家長嘅從小一至小六,天天同佢睇住啲功課、測驗同考試,升上中一就諗住佢哋可以自己來,我哋可以「甩難」,原來唔係咁咩?

趙:家長千祈唔好咁快放手,因為啲仔女以為升到中一考到名校,就可以好似「甩繩馬騮」咁大玩特玩,但其實佢哋喺中一,好多方面都未準備好;先從功課角度睇:小學只有八科,中一卻有十三科,科目多咗一半,功課自然增加;仲有時間嘅分配,小學生多數只參加一個至兩個課外活動,但中一嘅學生至少參加兩個,至多參加五個或以上,多咗活動,留番喺屋企溫習做功課嘅時間就會減少,咁就會成績下降;綜合來講:時間分配、語言不通、朋友不多等一連串適應問題會給中一仔形成巨大壓力,如果家長唔同佢分擔,佢哋好易會倒下來。

家:趙sir,你有乜提議?

趙:我提議喺暑假同中一訂立一個作息時間表(Time schedule)將在家嘅時候細分以下四項:一為「功課溫習時間」大約一小時,二為「休息遊戲時間」一小時,三為「談心事時間」半小時, 四為「就寢時間」。

家:呢四項有什麼要留意?

趙:等我逐點講:喺「功課溫習」 要留意小朋友是否明白,如果唔明白就要搵「外援」幫手;第二點「休息同遊戲」要同小朋友聲明用30·30·30做標準,即係如果用咗三十分鐘「打機」,就要用30秒(即係半分鐘)望30呎以外嘅東西例如一棵樹、一架車;第三是「談心時間 」,通常是在晚飯後坐在梳化上面,爸媽靜靜地聽仔女講當日喺學校發生嘅趣事,或遇到嘅困難,聽完就以接納的態度一同嘗試解決;第四項「就寢時間」,可以同仔女講一啲牀邊嘅勵志故事,鼓勵佢哋用正向態度面對一切。

家:如果爸爸媽媽要上班又如何?

趙:那便要培養仔女嘅自律,家長可以送一個計時器(timer)俾佢哋,訓練佢哋自律。

家:用計時器可以使佢哋自律?

趙:如果佢哋同意推行嗰個Time schedule應該可以,間中你可能在寫字樓打電話去提醒吓,鼓勵吓,提升佢哋嘅士氣,佢哋慢慢習慣就得喇﹗

家:用timer來做Big Brother都幾有趣,多謝趙sir指點迷津﹗

趙:不用客氣﹗

鄭秀文 許志安 黃心穎
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2021/05/2740chiu-20210511085411-572x1024.jpg