Advertisement
甘國亮.連載小說

甘國亮:你都有今日——各有千秋

專欄
2021.12.25
142
撰文:甘國亮

28eabc50-a7e9-4cae-a615-3a0c70dc90ab

老竇,我也猜想不到,這幾日在倫敦反而最無事忙,想同你通話幾分鐘,偏偏都是你們那邊半夜三更。也有三兩件事要向你報告:Pam的媽咪我的岳母,恨盡快自己跟岳圖團聚,情願由利物浦飛來倫敦,為一位老友,花店的老闆,做幫工而不肯收一毫子,那邊提供食住。她堅持不肯動用我們這邊的花費,很有原則的老人家。岳圖也有她的因子,什麽都一就一,二就二,從嬰兒逃過阿PAM後底乸想毒死他回望,第一晚他們兩母子也捉着我和阿Pam一齊宵夜,三個鐘頭裏,將各自三十年來吃盡苦頭的經歷,輪流句句真,但不拖泥帶水,又無嗟無怨,我真是敬佩萬分,我回來覆述三日三夜也講不完。岳母經已心軟,本來大馬是一笪令她永世發噩夢的地方,但這短短的一段日子,由恩人天奴叔,到常在心中的好姊妺阿Auntie Mary,兩個自己的大女同細仔,她的女婿,即是我,親家即是你,你的未來老婆Maria,連一個喺手機見到嘅BB……佢就覺得,上天俾佢再做緊第二世人,如果舊年佢病到差不多死咗,就冇今日。老竇,我冇出聲,當時我嘅心情同阿岳母佢一模一樣,如果舊年我冇蹙起條筋去香港搵你,呢一年其他嘅人都係有你,我先至有佢哋,所以我都係做緊第二世人,阿Pam唔興喊,但佢聽到我咁講,佢都認為,佢無遇上,我哋根本算唔上係一家人嘅一家人,以前嘅佢,一定唔似今日嘅佢,好啦,講住咁多先,有段片你哋睇,又係發夢都估唔到……Good night。

我和瑪莉亞這邊也是發夢都估唔到,擒擒青攬實家嫂Pam鹹濕老竇餽贈,這間有鬼屋潛質的嫁妝,但一個星期以來,我兩人不算奄尖,但另覓新居,無一間動心,值得快手換屋,反而開始捨不得搬走,始料不及,BB在那個廚房吃極不完的朱古力,全個吉隆坡找不到有售。

「我睇咗條片啦,佢哋三個後生,點解喺嗰邊做咗時裝模特兒咁㗎?」

「你沖涼嗰陣我又打咗過去問,我個仔話個導演,想將套電視劇加到十四集,盡量搵多啲唔同人咁品嘅後生仔孭飛,而家鬼佬好多大牌都冇戲拍,所以佢哋第一次喺三藩市見到阿蓋大班個阿Benedict,見佢又靚仔又高大,但似韓國男神,又識彈唱幾種語文嘅流行曲,跳舞又生鬼……」

「知啦,咁後來點解撞到阿Pam個細佬就飛甩阿Ben仔唧?」

「一日變幾次呀,阿岳圖唔想得罪阿家姊,猛求阿蓋老闆講甩佢,佢會珍惜咁好機會,去學做生意……」

「你跳去講條片係乜東東仲好喇。」

「個籌備組話,而家所有西方製作除咗一定要有黑人之外,愈嚟愈興有黃種人擔正,所以將佢哋兩個都嘜咗先,最好笑就係,佢哋見到仲有一個阿天奴叔個仔阿黑炭頭,三條後生仔成日buddy buddy,製片話最好身手係呢個,索性叫佢哋三人組都唔好計較住,齊齊當試鏡,一個唔該,佢哋三個都入選要晒。」

「我就覺得三個都好有特色,阿Ben仔樣樣都好勻循,但後生靚仔一唔興就會玩完,阿岳圖原來好Sexy,又勒突又cool,啲女仔會好想俾佢糟質,至於阿黑炭頭,身手好似世運選手咁,唔識做戲唔緊要,呢種做戲由後生做到老都得,襟擺呀。」

「嘩,你講嘢好似一代星探咁,經理人咁款。」

「我淨係叻,帶人去睇樓啫。」

莫文蔚 姜濤 星級企業大獎2020
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹