Advertisement
甘國亮.連載小說

甘國亮:你都有今日——天長地久 誰是兇手

專欄
2021.11.27
67
撰文:甘國亮

b489f680-18da-4f83-9547-687dc8600a65

BB人在吉隆坡,財源廣進,經理人師弟黃天蕩報喜,又有電視五分鐘短劇,暫定一百集,主人翁由小孝活上陣擔正,反而碧翠絲名氣過盛,偶然客串一兩集適可而止。師弟新增在農場學堂有導師之職,多重身份,經常微笑望天,埋怨退休無期。哎吔家姊鬼婆心態,放棄鋒頭躉的寳座,見自己扶腋過的大大細細都風生水起,經常披露蓋大班新猶盡快上市,自己去三藩市出席孫仔阿Ben大學畢業,就息勞歸主,倘若太多粉絲央求她要有告別藝壇演唱會,自不會辜負眾望,「乜都佢講晒。」BB已厭惡頻頻扮靚化濃妝着新衫,聽到未來天天要以男仔頭出現在電視講小童的新知識,聽到還要保持一頭更短的頭髮,興奮到一面剪髮一面唱歌仔。家姊又有最新發現:「嗰個哥哥仔見唔到碧翠絲返嚟農場出現,就冇心機跟佢阿媽嚟返學。」

「點會呀,你估好似我哋啲戲曲《梁山伯與祝英台》,個女嘅俾晒貼士,個男嘅都一嚿飯咁咩。」

「我有突發新聞報告,今日帶班學員去睇教堂加建的班房,就俾我𥄫到,阿BB最鍾意以前冇人去嘅教堂,拖住山羊仔去嗰度傾偈食生果,今朝佢個樣就係小孝活,拖住嘅變咗係嗰個哥哥仔。」

「吓?俾外間知道,會唔會影響啲廣告合約㗎?」

「哈,你有冇搞錯,全世界都知,碧翠絲又好,小孝活又好,都係一個BB嚟㗎喇。」

「所以家姊你嗰日撚化兩個細路哥,其實係佢兩個都唔知幾識做戲。」

「哼,BB唔係細路你同阿Maria生嘅,又唔係阿Howard同阿Pam生嘅,佢嘅戲劇細胞,係我呢個婆波過俾佢嘅,你都咪話。」

傍晚落班勇闖鬼屋火爐密室,是為魅影大減價第二天的節目,瑪莉亞帶客睇盤遲歸,由我先拔頭籌。明知實周身炭屑煤屎,一身黑衣人上陣,鋤爛化學的暗門門鎖,內裏豆膶幾呎地,屁股猛碰雜物,毫無戰地特務總部氣派。半掩甲萬門瀉出無數文件合約,懶得八卦,卻踩着地面滑潺潺一張八乘十照片,幾乎令我扻頭埋牆,閃過天光前夢境中預告的畫面。聽到瑪莉亞回來的腳步,太過熟悉,不似有穿高踭鞋的女鬼現身娛賓,我禁聲涉足衝出去,她剛好呷着咖啡橫過,我在後面高喝「咪郁」,嚇到倒瀉在全身尖叫。「撞鬼咩你。」

「撞唔到喎。」

「我呢件衫係Mary姐知我要見客,執咗成匧好新淨嘅俾我,呢隻咖啡乾洗都好難甩……」

「呢排你見親我都倒瀉咖啡,響醫院你見到天奴叔冇事醒番,成杯咖啡淋落我背脊……」

「你喺屯門碌落樓梯,成晚先醒得番,做人大難不死好難得……睇吓你,污糟到,發現到啲乜?」

「似係阿Pam後底乸估唔到自己死得咁突然,佢份人周之無日要勒索人,明知個掛名老公同個新二奶去第二個國家結婚添,所以儲緊好多證據,應該有好大堆,睇得出,裹面個甲萬都一定係我哋個親家老爺叫馬仔清咗一次,但有呢張躡咗喺甲萬底又封晒塵,可能後底乸見臨死你都捐血去救佢,就等我哋發現到呢張相,重婚可以去嗰個國家查,相片就得番呢張。」

「咁嘴對嘴結婚相好閒啫。」

「係。但眾目睽睽,個女人行緊禮將隻手放喺個新郎下面,如果打官司,都可以話佢唔慌唔係淫婦。」

「講落又係,阿Pam老竇咁有勢力,佢出面搵大國手都救到天奴叔,如果佢立心想放棄一個人條命,有冇我去捐血都冇分別。」

聲夢傳奇 姜濤 星級企業大獎2020
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹