Advertisement
甘國亮.連載小說

甘國亮:你都有今日——魅影大贈送

專欄
2021.11.20
31
撰文:甘國亮

1571d807-3d8a-453e-a135-9f99cc405363

心病最難醫,但我乖仔孝活當年差一點就殘廢,肯長備心藥自療,結果愈老就愈架勢,變回正常人一個。所以家嫂Pam的細佬,孝活的舅仔,這個硬淨的岳圖,近朱者赤,已改用柺杖,堅持可以開車送貨,趁下一水蓋老闆率領大黑炭和岳圖兩個少壯接班人,去英倫三四個星期集訓,自然有雄心壯志,勝過打針,又順帶探望三十年後才見面的生母,好事一齊來。

為怕Pam老竇變卦,瑪莉亞失驚無神,捉我一齊出馬,用百忙中的三十分鐘就將對方相贈的兩層舊樓過落我二人名下。本來心中詭計是話名已立即搬入去歎世界,實則荒廢一頭半個月,就另覓將之換作其他筍盤。「呢幾日我哋嗰邊寧舍焗,但我哋前日去到呢邊,就好風涼水冷喎,我坐喺佢哋搬剩張梳化,數十聲就爭啲瞌着。」

「日唞就唔驚啫,夜晚你唔驚陰風陣陣?」

「有乜好驚,我捐過血俾個屋主喎,佢個亡魂返嚟我咪沖杯咖啡佢飲。」

「牙擦擦,你知我叫唔醒,如果我瞓喺你右邊,瞓瞓吓你左手邊便多咗個男人,你唔使叫醒我話我知。」

「你身邊瞓瞓吓多咗個女人,我都唔會叫醒你。」

「橫掂阿BB今個禮拜輪到返去阿孝活兩公婆屋企嗰邊瞓,我哋咪過嗰間大宅度探吓險,我係唔忿氣,嗰面仲高過人嘅大鏡呢,係都整蠱我,我係都要失驚無神撲去佢前面,見到我喺鏡裏面為止。」

「我哋去玩之嘛,當遊山玩水,無謂玩過籠,我哋今晚叫宵夜上去食,食完唔扯好唔好?」

暫定入住七日,歡迎離奇怪誕的事件,第一晚剪綵,兩人在呷甜點番薯沙谷湯時,都聽到廚房有鬼祟的腳步,令人失望的是已故主人鄧天秋的近身,仍有後門鎖匙自出自入。「唔好意思呀,你兩位係阿易生易太呵?仲有幾袋濕星嘢,我負責執乾淨,我冇嘢要再嚟,揪鎖匙順手放低埋俾你哋……」

「問你就啱咯,間屋咁快就清晒,點解大馬一年到晚都咁熱,但間屋有成兩壇火爐嘅?」

「啲設計好值錢啩,啲大戶人家好鍾意訂埋晒啲英國珍藏……」

「咁後面上二樓之前個壇又煙麈滾滚污糟邋遢嘅?」

「做戲呢啲係機關,唔係真嘅,可能捐入去有道門,落去係個保險庫,收埋晒啲矜貴嘢喺裏面……」我兩個故意猛唱雙簧。

「我哋下人,唔知咁多,夜啦,兩位早啲唞……」這個心有屎的內應,走夾唔唞就真。為時尚早,但深入該黑洞探秘,還是留作明日的壯舉。但今晚開張得個桔,我倆分別在巨窗前享清風,「我仲以為咁光晟晟,盞街燈喺出面,冇窗簾點瞓,點知原來今晚個月光咁靚。」

「我呢邊冇喎,黑麻麻想落雨咁添。」

「不如數三聲,我哋交換位置。」

「好呃,一,二,三……」兩個窗台一模一樣,望出去畫面都一模一樣,只是瑪莉亞知我黑仔,讓我有得曬月光。「好呀,我信你,即管整蠱我哋兩個,都唔知幾Romantic……」

臨天光發夢,預演去那火爐內深入險境,無現鈔古玩美酒,卻有一張鹹濕親家偷歡的罪證照片。

陳卓賢 星級企業大獎2020 聲夢傳奇
人氣 TRENDING
張家朗 何詩蓓 姜濤 MIRROR ERROR 東京奧運 香港小姐 聲夢傳奇 炎明熹