Advertisement
甘國亮.連載小說

甘國亮:你都有今日——歸心似箭

專欄
2021.10.02
61
撰文:甘國亮

295976c7-cff8-4a9d-a65c-183e2ce30739

一個月後,一家成員,又會再各有各任務重訪英倫,對親家鄺大姐無依依不捨之意。她知我愛上她巧手的煎餃,獻上新鮮鍋氣的保暖袋,讓我們在機上祭肚思人。哎吔家姊到處都有咸豐年粉絲,得到升級到四人私家位,於是大安旨意,細聲講大聲笑,放心話食就食,瞓就瞓。家嫂Pam和孝活索性叫我齊齊換上還未印上大馬農場寶號的白笠衫,實則對此行比預計更順風順水,飲得杯落。

「Auntie Mary,我哋間助學基金會個名,阿蓋Uncle鍾意邊個?仲未拍板?」

「我就鍾意你想到嗰個英文名,乜嘢『現多滅……』,好清新,唔老土……」

「但係Indomitable好拗口吖嘛,而家啲後生仔,有啲連點解都未知,中文仲『不屈不撓』,好惡記。」

「喂,阿細佬,你諗個名又易記,人人聽到都興奮,鼓勵到啲後生仔俾心機做人嘅。」

「唉,幾十年來,都係啲老嘢作怪,教壞晒啲後生仔,一咪塞錢佢哋使,一世最緊要有冇發到達……慌佢哋唔死……我哋呢間幫啲有性格但又冇家底嘅,我哋快馬幫佢哋搵到自己嘅強項,供佢哋再進修,催谷一批做人嘅樣辦出嚟,唔使驚冇人知我哋做緊乜……」

「PK Daddy,你先至係睇得最通透,最入世嘅顧問……」

「我可惜醒得太遲,咁老先破產,好彩有汽水蓋打救我,好彩佢有個阿媽做我哎吔家姊IQ咁高,乜都快人一步點醒我……」

「喂喂喂,細聲啲好唔好?演講咩?出面都聽到晒。」

「講得唔爭在,人會變就月會圓,咁老我仲有個仔肯教我,肯影響到我,做人永遠都唔會太遲,佢仲娶到個老婆有佢咁叻……」

「老竇,你啲口水噴晒落啲餃子度,哈……我冇我老婆咁叻……」

「Pam,你阿媽生你同你細佬,兩個都咁叻,佢咁多年,多多少少都知自己有個巴之閉嘅屋企,但有個老竇由得個,咁陰險嘅奸妃去害你哋阿媽,買兇去將你得歲零細佬落毒,佢大難不死,我哋真係估唔到,佢自細到大,係點四周圍流浪,點養大自己,點解唔去認番自己個老竇,假假哋過番啲好日子……Pam,嗰日我見佢識得喺農場後山個水氹,烈日當空咁躀水,幫自己當水療咁醫自己隻腳……我就明,送多個舅仔俾我個仔,佢真係我個偶像。」

「PK Daddy,你先至配係做我Daddy,

你先至係我偶像。」

「阿Pam媽咪有張相,攬住一歲大嘅Octo,佢叫我哋代佢拎番去俾個仔睇……」

「你睇吓阿素芳後生幾靚女,阿Pam你細佬自細幾有男子氣概。」

「所以,走唔甩阿蓋大班勝在有對慧眼,佢第一次𥄫到呢個男仔,就話係可以groom到嘅人材。」

星級企業大獎2020 姜濤 莫文蔚
人氣 TRENDING
張家朗 何詩蓓 姜濤 MIRROR ERROR 東京奧運 香港小姐 聲夢傳奇 炎明熹