Advertisement
甘國亮.連載小說

甘國亮:你都有今日——利物浦現場傳真

專欄
2021.08.21
133
撰文:甘國亮

54kam01a

一生五臟肺腑受創過多的人,如阿Pam的生母,面部表情欠奉,眼神與其說是慈祥,實情是呆滯,聲音柔弱,問非所答,只有孝活這個未來女壻的殷勤有禮,發放他無敵的磁性聲音,贏得岳母最窩心的反應。我一支公做現場新聞轉播,瑪莉亞在吉隆坡電話接個不停……

「吓?阿Pam媽咪張相係而家影㗎?啲眼耳口鼻仲都靚喎。」

「可能捱得多又病得多,成日眼瞏瞏咁。」

「陰功,佢兩個敬咗茶你親家飲未呀?」

「有,佢見到靚仔,猛望住阿孝活,唔得閒望自己個女添呀。」

「咁個老頭子呢?仲好意思咁面皮厚,返去見佢?乜反應呀?」

「哈,佢開親口,阿Pam個媽咪都望去第度,唔知有人講緊嘢咁。」

「抵死呀,咁有冇機會講咗阿Pam個細佬Octo生勾勾,已經大個仔件事未呀?」

「我哋夾好晒,唔俾阿鹹濕伯父知,佢預咗自己不受歡迎,我哋一吼佢出咗後巷食雪茄,阿Pam就俾手機佢同個細佬喺農場張相出嚟,一口氣乜都講晒……」

「咁曲折離奇,點反應呀佢?」

「佢一路都仲係冇表情,但輪到佢問點解唔一齊嚟,當聽到個一歲大之後就冇見過嘅仔,俾隻馬踢傷,坐緊輪椅,張相係夾硬扮企起身拉馬,應承好番就會自己買機票嚟見面……個阿媽聽到呢句,當堂眼淚落雨咁,喊到收唔到聲……」

「唉,係我都會忍唔住……咁有冇勸佢考慮返嚟吉隆坡,飲兩個後生餐結婚酒呀?」

「一口氣講咁多嘢,佢啃唔落,仲有,喺呢度就大家一條心啫,但你嗰邊,有個『等天收』吖嘛,想第三次世界大戰咩?」

「哦,咁我要講個好消息你知,阿『天奴叔』啱啱打電話俾我,佢見你哋到埗,樣樣順頭順路,唔想搵佢個主人報憂……」

「阿『後底乸』瓜咗?」

「仲未,但醫院話,叫大家有個心理準備,隨時趕返去。」

「好到極吖,一有呢個喜訊,我搶先去公布,冇人會鬧我……唏,唔講住……原來我都有新抱茶飲,輪到我啦……」。

飯店的下午茶,水餃馳名又搶手,女主廚讓阿Pam率先向我孝敬。七老八十的人,最鍾意做一廂情願的事,哎吔家姊掌握時間,押解Pam父前往另一地段簽訂若干飯店股份予Pam母,當贖罪已屬濕碎。入夜飯店提早打烊,新任股東鄺素芳見大門有「東主有喜」的字條,悶聲不響的撕下來。人頭得數個,連鴉雀無聲都算不上,後鑊交心湊高興 ,但一向有人緣的鄺大姐,親自落廚又出又入,立體身歷聲由哎吔家姊單拖自問自答。我的手機響起,見是瑪莉亞來電,Pam父不知人間死活,同時舉杯:「阿Howard Daddy,大家飲杯先喇?」

瑪莉亞揀啱時間,值得我堅持,「聽咗係咪好消息先!」

 

陳卓賢 姜濤 聲夢傳奇
人氣 TRENDING
張家朗 何詩蓓 姜濤 MIRROR ERROR 東京奧運 香港小姐 聲夢傳奇 炎明熹
https://www.mpweekly.com/entertainment/wp-content/uploads/2021/08/0011-20210811095411-150x150.jpg?v=1628675652