Advertisement
甘國亮.連載小說

甘國亮:你都有今日——眾不叛 親不離

專欄
2021.07.31
61
撰文:甘國亮

63d3c38f-6d4e-4ffe-855a-003a6f0e1e73

明明這四十八小時是獨享的二人世界,眾台柱又試逐一來搶鏡頭,瑪莉亞𠱁我開心,發明一句自我安慰的說話……「一年前孤家寡人,逐個黐埋你身邊,一定係前世我哋欠你嘅。」嗒的糖是蜂蜜。

第一組孝活和阿Pam,入夜都情願飛車過來,模仿我倆,上演夜雨難瞞……哈……我也不知我死鬼老竇,動不動隨口噏的四隻字有何景轟。由得兩個人神秘失蹤一陣,BB與一個小皮匧同行,塞滿用來拍童裝廣告的男女新衫,一個人仔自說自話猛爬高照鏡,當在無人之境。到那對鴛鴦回歸,一陣酒咪,看來適合趁此時刻告知,阿Pam親弟之所以不想見面的慘情,醉意反而不會愁更愁。

「唔緊要吖,大把醫生,俾馬踢親之嘛,我實醫番好佢,我哋唔使認番,知佢大個仔,張相咁Man,我都唔知幾開心……」

「嗱,嚇吓你哋先,除咗我同阿Pam阿BB,頭先又收到阿Auntie Mary,阿汽水蓋Uncle,阿天蕩師弟Uncle,聽朝一早就入嚟呢頭,叫我哋個個唔好走……」

「吓?嚟拜年呀?要咁人齊做乜呀?」

「好事嚟㗎,因為阿天奴叔退休,係返去佢個仔一直打工個農場馬房,兩仔爺一齊過日子。」

「咦?你細佬,咪就喺嗰度?」

「所以我聽朝都會一齊去探我細佬。」

「關其他人乜嘢事?而家啲後生仔好怕啲人趁高興,開Party咩。」

「老竇,一句講晒,阿蓋大班,佢想買起嗰個農場,Auntie Mary贊成到極,佢仲打算侵本………」

「仲會將嗰度擴大交俾阿天奴叔管理,佢個仔同我細佬,就俾心機幫手,過的平靜啲日子。」

「聽落真係幾好……」

「我哎吔家姊唔夠一個禮拜就唔見人啦,叫佢做尼姑咩。」

「佢哋今朝電話同個老細傾好晒,仲諗住攞今次籌到啲基金,幫啲冇工做嘅後生仔,文又好武又好

,可以留喺大城嗰邊學乜嘢都可以,有興趣農業就去畜牧,都唔知幾有前景。」

「咁即係乜都冇我份喇?」

「易Uncle唔好咁講喇,做生意有好多嘢,係你先諗到,阿蓋大班親口咁講㗎。」

這種時代,難得幾十年後才得到的乖仔,帶來一個,真嗰句講嗰句的未來老婆,有賺了。

清早全軍浩蕩到達的大自然,有福地的氣味,發展這盤生意,市井定冇鞋挽屐走。地勢令人分批四散,阿Pam之弟明顯不願主動出現,天奴叔的黑炭頭兒子,做好做醜引領阿Pam幾個女人前去搜尋。BB見到甚多小馬子,立即跌撞追趕,孝活已當正養女一般作護花使者。我跟汽水蓋也目擊坐在輪椅的另一黑炭頭,見到阿Pam仍無法撐着站起來,不想直望自己一歲才見過的姊姊,Pam摸着他的面,也很平靜…………「你好番,就俾心機幫你個老友,幫佢Daddy打理呢度,乜嘢人都唔會知,你想見我,一個鐘頭車,我就入到嚟……你十月八號出世,不如我以後叫你做Octo,係得我哋兩個知,我都識騎馬,遲啲睇吓你叻定我叻……」這段說話簡直是人上人,遠觀的唉吔家姊和瑪莉亞,已皇帝不哭太監哭。我和汽水蓋也不做冷血動物,急步去四圍參觀兼發表偉論,這個患難契弟,笑淫淫滿肚大計,我也真心醒他雙贏的「V」字手勢。

星級企業大獎2020 聲夢傳奇 莫文蔚
人氣 TRENDING
張家朗 何詩蓓 姜濤 MIRROR ERROR 東京奧運 香港小姐 聲夢傳奇 炎明熹
https://www.mpweekly.com/entertainment/wp-content/uploads/2021/07/79564fea-4c87-424f-9967-6c2df739346e-20210727081956-150x150.jpg?v=1627373996