Advertisement
甘國亮.連載小說

甘國亮:你都有今日——驚完又來驚過

專欄
2021.06.12
35
撰文:甘國亮

44kam01a_%e8%aa%bf%e6%95%b4%e5%a4%a7%e5%b0%8f_%e8%aa%bf%e6%95%b4%e5%a4%a7%e5%b0%8f

臨時臨急都生安白造到一場絕無冷場,驚心動魄的折子戲,將太子女彭美拉的後底乸「等天收」,嚇到鼻哥窿冇肉,無鞋挽屐走。我等幾個人在廳中窗口向汽車嗡起口面舉手送別,三秒後已爆笑到要碌地,剛才失場的氣水蓋,因避忌那位不速之客,不便出現,從二樓下來也笑個不停。「乜得阿BB妹咁叻,唔係天才童星呀,係天才嬰兒呀,阿嫂抱番佢上去沖涼,佢仲走入我房扮鬼嚇我添呀,哈哈……」家姊冇大家咁好氣。「我都唔明呢個『鄧天秋』,乜得佢咁得閒,一落機就踩入嚟,我都係唔明佢想點……阿師弟,話晒呢間屋……阿太子女個細佬,真係得嗰一兩歲就喺呢度死咗,我哋借佢嚟整古做怪,都唔係幾啱規矩嘅,聽日你去問吓啲師父,我哋買啲乜嘢返嚟拜吓個細路哥……」我愈聽愈打個冷顫。「咁我哋頭先冇問請過人哋,冇問聲佢攞個版權,就叫阿BB扮佢去嚇個後底乸……」

「我真係保你大,呢啲嘢唔攞得嚟講笑㗎,仲有你頭先放個屁,係就係夠大聲,嚇到人打個突,但臭到我都掩住個鼻講唔到嘢。」

「有啲屁會聞到唔臭嘅咩,阿汽水蓋,呵?」但蓋大班冇陪我癲,面口反而煞有介事:「個細佬哥幾時死㗎?」

「頭先喺車,阿彭美拉話自己兩三歲個細佬出世,跟住就睇住佢一歲就俾人落咗降頭就死咗……」

「哎吔,我哋整走咗嗰個後底乸,一味笑餐死,好心你兩個唔好再開個咁嘅話題。」

「咦?咁頭先咪卡士錯咗,唔應該叫阿BB扮個一歲就死嘅男仔喎,我哋數吓手指,阿孝活話阿彭美拉都三十三咯,當佢冇報細數喇,即係佢個細佬,而家都三張有突喇,牛高馬大至啱喎,我哋冇乜邊個啱扮佢。」

「好心喇,就嚟天黑啦,呢啲嘢不適宜講,等阿師弟你聽朝一起身就去作個福……阿孝活返嚟啦……做乜佢哋兩母女臨上車,仲有乜嘢講?」

「我唔知阿Pamela講真定講假,佢或者幫我哋嚇多幾嘢佢阿媽,話離遠好似見到佢阿細佬企喺大門口喎,連我都毛管戙一戙。」

「我都開始有啲後悔咁嚟整蠱佢阿媽,不如我哋早啲扯,出返去食飯,喂阿蓋仔你做乜唔聲唔聲咁?」

「媽打,你聽咗就算,唔好咁認真,我一嚟咗吉隆坡,你哋咪話柄我嚟山旮旯呢度住,安全啲,但我嗰幾晚,屙親夜尿,都見到下面天井有個BB仔走走吓,我咁大個人乜嘢未見過吖,諗都冇諗,問阿彭美拉喺度過夜啲保鑣,話怕係隔籬屋啲細佬哥喎,我心諗,講笑咩,隔籬屋?行半粒鐘都未嚟到喇,仲識得行入嚟人哋個天井?」

「唉吔,你哋有冇『景然棧』嘅電話?訂位喇,我哋即刻去㗎啦。」

「蓋Uncle,你見到佢乜嘢樣㗎?」

「咁細個,一仆一碌咁走走吓,日光日白,你會想埋去抱吓佢……」

「咁係佢啦,Daddy我哋嗰次第一次入嚟,用視像同蓋Uncle傾偈嗰次呢,我去後面廚房煲咖啡,我都見過,當時以為係看屋成家人住喺度,但個咁細嘅細路哥,應該係蓋Uncle見到嗰個……Daddy冇聽到你有見到過?」

「唔好預我,唔使客氣,我好爛瞓嘅,我冇本事湊兩個BB,家姊我哋嗌阿Maria同BB落嚟一齊行先。」家姊見師弟聽得津津有味,「喂,你仲未打電話有冇位?作死呀?」師弟嫌未被鬧夠。「我都有見過㗎……不過喺深圳,唔係喺大馬呢度……」家姊已披回大衣,用手袋摑師弟頭,「講夠未,講夠未,罰你今晚扐啲宵夜返嚟,見到一歲又好,三張嘢又好,你就同佢哋一齊食喇吓。」

「咁你哋又話隻……個細路應該而家都三十幾嘅?」師弟搶先開大門前但仍回頭追問,再吃多一下手袋襲擊。

星級企業大獎2020 莫文蔚 陳卓賢
人氣 TRENDING
張家朗 何詩蓓 姜濤 MIRROR ERROR 東京奧運 香港小姐 聲夢傳奇 炎明熹
https://www.mpweekly.com/entertainment/wp-content/uploads/2021/06/aa-20210609095352-150x150.jpg