Advertisement
甘國亮.連載小說

甘國亮:你都有今日——戰爭冇和平(上)

專欄
2021.05.22
44
撰文:甘國亮

41kam01a_%e8%aa%bf%e6%95%b4%e5%a4%a7%e5%b0%8f

八大高層緊急會議改在酒店頂樓舉行上半部,下半部瞬雷不及掩耳,才移師去山旮旯大本營埋尾,事必有因。

BB昨晚輾轉不眠,今早穿戴齊整,如睡公主再在沙發安哥再睡,其餘人等,汽水蓋和師弟知要外出,又試同一造型,前者減了江湖氣,後者就收肚演胸,家姊今日如法官一般的莊嚴,我從來對她如何永不重複裝扮,是否有幾十個衣箱跟身,毫無興趣八卦,幸好未來老婆識做人,偶然一兩句恰好的讃歎,無落錯鞋油。

「做乜阿BB瞓着,隻手仔都久唔久舉高想開槍咁?陰功,咁細個人,梗係啲陰影未散,阿師弟你去開還神嗰陣,順手同BB領枝平安籤喇……」孝活已接到彭美拉上來共聚。

「今日就等阿Honey,講吓我哋點解要撲嚟撲去,你主持大局喇。」

「冇嘢嘅,我最信得過嘅天奴叔,佢搜左嗰邊成晚,發覺多咗啲新裝嘅偷聽器……」

「吓?愈嚟愈似特務片咁。」

「阿Howard爹哋係咁跩,佢知我哋個個都冇覺好瞓,想我哋唔好硬晒軚咁……」

「唔係呀,連Pamela都估唔到係邊個咁快手,我唔敢亂估。」

「我希望唔係我愈幫愈忙……蓋Uncle,你先唔好怪我,因為咁大件事,我屋企啲人,點解樣樣都咁快知道,但又冇返嚟睇吓點,連我同易Uncle你位公子猛散啲似就嚟結婚嘅新聞,我爹哋同我而家嘅媽咪,都冇彈起,又冇追問,所以我都覺得有啲唔對路……蓋Uncle,雖然今次你好彩冇事,但今朝我捉實老管家阿天奴,佢其實係喺我屋企睇住我大,佢終於講我知,佢話……你有個親信叫阿趙,自從你離開咗香港之後,佢都失咗蹤幾個月,但突然打電話嚟吉隆坡俾我呢邊同阿天奴講,佢好好心,話蓋Uncle想同佢做事嘅人,個個都好好地生活,唔准佢哋再掂你任何一件事,佢話,我而家個媽咪,係知道好多蓋Uncle你同對頭人好多嘢……所以嗰晚,唔怪得知,等我哋鬆一口氣,半夜佢哋先至突然郁手……咁多位,我晤知有啲咁複雜嘅關係……」

「唔緊要唔緊要,我哋呢邊都好複雜……」

「喂阿細佬,我都唔出聲咯,講少句喇……」一直眼定定的汽水蓋,讓大家都眼定定的望着他,孝活遞過一杯不是烈酒的熱茶。

「Pamela,難為你,我今次返嚟係唔聽話,我個媽打,你哋個Mary姐,幾想見吓我,都唔准我返嚟,我係預咗聽完睇完佢做善事,就算淨係攬吓佢,已經夠啦,成件事要多謝你嗱屎上身,唔好意思,我講嘢係咁粗俗,我點會諗到,臨尾我都走唔甩,係會冇命,點知,坐喺呢度,個個都有份救我。阿師弟爭啲俾佢嗰條韓國婆捅死,仲未止,後來黑鼆鼆又為我擋咗粒子彈,Pamela你同Howard,分分鐘個韓國婆追到你哋架車,醒個炸彈俾你宵夜,咁你兩個就要响地府結婚,你哋唔好笑,到我兩兄弟阿PK,佢講嘢就成日吹脹你,但佢遇到唔係你死就佢亡,你有十條命都唔夠佢嚟,仲有阿嫂,唔好以為佢女流之輩,佢成日攬住個BB當命根,但為咗秤起服裝間度門,俾我扶住阿師弟落去,又要俾番阿PK上返嚟,度門幾十磅㗎大佬,仲唔止,嗰個躝癱衝返入去,係就係阿PK好彩咁神化,叫個仔頒枝改裝過射撞針嘅玩具槍,見條友睇中個䁥埋嘅BB,冇法唔開槍亂射,偏偏中正對方以後冇仔生嗰度,條友痛到掉甩枝真槍,都仲未止,一個一歲嘅細佬哥,乜嘢係槍,係會死人嘅,佢點會知,但佢識得掃走嗰枝會殺死佢全家,嗰枝唔知係乜東東,咁我哋終於先至人齊,今日個個生勾勾坐晒喺度,我篇演講辭講晒啦,悶親阿BB,打鼻鼾添,阿Howard,你杯茶好好飲,媽打,我應承你,咁多人冇死到,都係想我做番個好人啫。」

馬國明 星級企業大獎2020 黃心穎
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2021/05/001-20210518100425-150x150.jpg