Advertisement
甘國亮.連載小說

甘國亮:你都有今日——羅漢奇兵有豪情

專欄
2021.03.27
109
撰文:甘國亮

33kam01a

大卡士的工作會議,由哎吔家姊出通告,竟然不在鬧市進行,全體是隔過渣的自己人,我自然不能倖免,我仍未有得註冊的未來老婆和未來外孫,BB新增的舞台藝名叫碧翠絲,因互助而暫扮拖友的孝活和太子女彭美拉,洗心革面重新入局的師弟。操去山旮旯的基地,摒除所有慈善騷的班底人員,連下午茶也是預訂到會,這個剩下來的金裝名單,我們心知肚明是「拯救蓋世太保潛來大馬探老母秘密行動」各人述職的候命儀式。

「阿Maria,唔使監阿BB坐定定,冇咗阿爸阿媽啲細路哥,都天生話頭醒尾,任得佢周圍走,阿師弟我咪叫你買定筒雪糕,頭嗰截你唔聽都得……你陪阿BB練吓歌喇……」

「你又話我樣樣都要聽晒入耳,以防萬一嘅?」

「嗱,個個都為我好,最多謝係阿Pamela,你樣樣都支持我哋,咁大人情,我都唔知幾望阿Howard仔同你唔好拍假拖,我哋個個攬埋一堆,你錫佢佢錫你我又錫佢,咁我早啲死都眼閉……」

「咁亂倫呀,啲下午茶架車幾點鐘到呀?」

「你呀,調轉兩仔爺,你做阿孝活,孝活做你老竇,咁就天下太平。」

「阿Mary姐,你俾定個心理準備我喎,免得我簽字嗰陣,唔知邊個係老竇邊個係仔呀……」

「一啲都唔好笑呀……」

「Warm up咗囉呵?我講先嘞,下星期一,二十九號,我同Pamela兩個就同阿天蕩哥一齊飛,會有人通知啲娛樂版又好,金融版又好,收到風喺機場捕我同Pamela靜靜雞拍拖拍到去新加坡,天蕩哥就解圍講慈善騷,擾攘一餐,Pamela到你講……」

「我哋會有人,會合到嗰日又喺Singapore到埗嘅汽水蓋Uncle,唔好意思,我學你哋咁叫佢……啲自己人將當日阿天蕩哥同阿蓋Uncle由頭到腳,跟足扮到兩個人,分唔出為止。」

「入黑前我哋三個就飛返嚟吉隆坡,其中一個即係換咗阿蓋Uncle……我哋已經同佢搞掂係扮阿天蕩哥啲證件。」

「你哋猛提我個名,我眼眉都跳晒,我就由陸路過境返嚟。」

「話就話好似睇戲咁順利啫,萬一對方仲有線人,追蹤到阿汽水蓋兜新加坡入境呢?」

「唔使驚,我個仔呢幾個禮拜隱形人咁閃出閃入,到其時佢會執生,教番我哋轉頭㗎嘞。」

「嗱,阿師弟,今次輪到你做男主角啦,唔好騰雞呀你……」

「總之今次係阿細佬你做蠶蟲師爺,我旨意晒你哋,我淨係恨佢平平安安,佢返得到嚟,攬吓我錫吓我,係咁多就夠。」

「Auntie,一定冇事嘅,海關嗰度我哋有好多世叔伯自己人嘅。」

「Mary姐,你俾我多口講一句,你叫阿蓋大班佢收山喇,咁大風險,都有本事返得到嚟,見到你咯,點解唔服侍你一世?」

「你最乖,你唔係冇角色,就由你同佢講好唔好,你講啲唔係古仔,你啲家人,冇完一個又一個,你都係咁頂硬上,你先至最有資格去點醒佢……」

忽然大會要兵分幾路,女子組握腕飲泣,嬰兒組餵小熊吃雪糕,麻甩佬組風聞下午茶餐車已經到,跳起身出迎。

鄭秀文 許志安 馬國明
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2021/03/33kam01a-20210324100300-150x150.jpg