Advertisement
甘國亮.連載小說

甘國亮:你都有今日——追蹤北極光

專欄
2021.01.31
31
撰文:甘國亮

25kam_%e8%aa%bf%e6%95%b4%e5%a4%a7%e5%b0%8f

我用腳撐開旅行車的尾門,烏燈黑火,幾乎撞到從車頂取下單車的孝活。

「邊似有乜嘢極光?我唔恨睇,青悲悲映落班人塊面度,殭屍出動咁……」

「今晚啲天氣頂多一個鐘就有射到嚟,前面間屋仔有酸酸啤酒賣㗎啦,我唔帶阿肥仔去,你睇實佢喇,啲本地人話,一百隻赫斯基狗起碼有九十九隻,對極光都睇慣睇熟,睇到都擰歪塊面,但阿肥仔咁大個都冇遇上過。」

「你唔好捌呀,我數三聲就瞓着……」

講得出做得到,人未轉身就發夢發到……BB妹喺我哋租住間屋眈天望地,似俾個拐子佬秤住走,so sorry,係我個仔,唔係拐子佬,見唔到塊面,起碼認得出,佢久不久上斜坡用嘅鋼柺杖……點解BB佢細細粒好似好認得路咁……點解佢會嚟咗呢啲凍到甩肺嘅哋方……佢阿嫲阿瑪莉亞宋去咗邊……輪到數三聲我就醒番,肥仔在我被竇暖笠笠,單起一隻眼,夢中那個畫面原來已足夠孝活一來一回,一隻手灌啤,一手閃車頭燈掃射這邊衝過來,他其實充滿我的基因,隨時隨地彈出不可思議的行為……手機在深山響到攞膽,現出宋阿嫲身在吉隆坡酒店房浴缸,沒有皂泡遮掩……

「又話你哋今晚影啲乜嘢極光我睇?」

「冇呀,霎眼嬌就拙一聲冇咗啦。」

「唔信。」

「唔信就叫Howard佢埋嚟,兩仔爺飲住啤酒等你企起身,好唔好呀?」

「佢真冇你咁鹹濕呀,嗱,你哋就嚟飛返嚟咯,你家姊話,佢睇中咗個筍盤,等唔切你哋返到……」

「吓?咁快又有筍盤,係咪對方睇中佢做咗新鮮拿督夫人又疊水呀?」

「你冇好嘢……」

「喂,你開始識得鬧我……」

「點敢鬧你……」

孝活用酸酸啤交換了我的手機,「廣告時間呀!係咪阿蓋Auntie睇中個寫字樓俾你留喺大馬開分店?」

「你最睇通人哋個心,佢知你就海闊天空,但如果我留低响度發展,咁即係阿BB就實跟住我唔會返香港,跟住……」

「跟咩住唧,呢條選擇題都講咗十幾次,個個都係老嘢,買大買細之嘛,駛唔駛等阿BB妺揸fit吹雞吖,嗱,阿Howard,你做我代言人,一句講晒,阿Maria鍾意做我新抱,你就追佢娶佢,等於一家親,我鍾意見邊個,大大細細都見得到,連呢幾句,我都講過好多次……」

「喂,你兩位唔好搵我嚟搞喇……」

「Howard,唔該你用個手機對實你爹吔……阿易老闆,自從第一日我喺屯門見到你瞓响架車,教你去接你老友個仔放學,初初唔敢俾你知道,點解我有個BB收埋,但你原來係個心地好好嘅人,你錫佢仲多過我錫佢,人哋對你講乜做乜都睇唔過眼,我都覺得,係佢哋先至有問題,你跌落樓梯爭啲冇咗,我覺得仲慘過我以前所有嘅事,人哋唔知道,見到我哋,仲以為我哋係老夫老妻……你家姊今朝早……省到我㕸㕸令,佢話有乜好驚,仲等乜嘢?仲有乜嘢值得驚……」

孝活像個手攰的新聞攝影師,「阿新聞報告員,係咪又到廣告時間啦?」

「老竇呀,你係都要佔上風嗰喎……」

「你影番我,對住我,對住我……你浸响缸水咁耐,又唔肯企起身……我哋聽朝就返到去屋企,嗰度都有沖涼缸,輪到我打俾你。」

一個好眉好貌的職業女性,淡定,冷靜,偏要認命,後生遙遙,愛人空難,仲要留下遺腹女,養大之後嫁到殷實女婿,怨句上天作對,惡運不絕,兩人竟又車禍歸西,剩下幾個月大的女嬰,只得這位半百的外婆宋瑪莉亞撫養,吞下由背脊落。命招的人,還要買一送一的嫁給我……

 

鄭秀文 許志安 黃心穎
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2021/01/25kam--20210128091313-1024x340.jpg