Advertisement
甘國亮.連載小說

甘國亮:你都有今日——無酒吐真言

專欄
2021.01.02
16
撰文:甘國亮

21kam01a_%e8%aa%bf%e6%95%b4%e5%a4%a7%e5%b0%8f

拿督夫人,我們五體投地的哎吔家姊,永遠不記仇,朝早反面,不到中午都可以跟對方共膳,我和孝活,瑪莉亞和新改名孫女BeatriceBB妺,三大一小已得到永遠特赦令,但恨錯難返的天蕩師弟,數手指已是昂然踏入冷藏第二周。

「嗱。阿仔阿孝活,返到去挪威,你幾忙都要𥄫實你個老竇,佢喺南半球呢度都仲牙擦擦,去到佢騰雞㗎啦!」「Auntie Maria,我哋第一站搵到間屋側邊啲水好淺,Daddy可以勤啲游水,等於勤啲做多啲物理治療。」「游還游,你小心攝親呀……」後生那位瑪莉亞宋,皺起兩條電車路來苦口婆心。「好喇阿Howard,你簽張生死約,保證我條屍原裝運到返嚟。」「掌過你把嘴呀。」「阿Mary姐,我哋要佢日日都用手機報平安呀。」「日日都係三幅被,我換幾套衫拍定幾條片,橫掂都係嗰幾句嘢。」「放心放心,我上身,佢後生嗰陣好叻執生……」「而家呢?」「而家都係!」「你兩仔爺好自為知喇,嗱,我要知兩件事,首先,阿仔你返到去奧斯陸,係要搞掂嗰基本同呢度合併嘅林審嘢,我對你放心,但,我响吉隆坡呢邊同你做守龍門,有樣嘢好蹺蹊嘅……家吓個個都喺度,不妨俾我哋知道……你同阿太子女有冇拍吓拖咁呀?」孝活很少打個突,將咖啡呷盡,「你問住第樣先,俾我諗一諗。」查實我同瑪莉亞宋伸頸以待,低頭等答案。「好呃,有定冇,場波就唔同踢法。因為我知道嘅係寫包單,太子女响英國讀書嗰陣,同個鬼妺行得好埋,呢邊屋企又驚又震晒,十萬火急搵人去捉佢返嚟,阿太子女同個鬼妹跳橋,唔知係邊條橋呀吓,終於兩個話就話救得返,但有一個就從此唔見咗,我哋而家見到個太子女,一年前返到嚟都唔見咗一排,聽講佢老竇老母監佢睇咗大半年心理醫生,但而家邊度有人當呢種係病,人人再見返佢,佢都係笑口噬噬,見親男人,都拋晒生藕……」「家姊,你係咪响FBI都有份兼職㗎?」「我淨係想問阿孝活仔,你知唔知呢啲事,你鍾意佢想追佢,冇蝕底,佢屋企多謝你,個女仔就算詐諦俾你追,佢屋企一定多謝你救咗佢成家……」「蓋Auntie,我冇追佢,佢亦都冇詐諦追我,冇啲咁戲劇性嘅事,我真係好急,要去一去廁所。」「唔好意思,我都要去一去,好快返嚟。」兩人分別借尿遁,我也無癮發表偉論,「佢兩個唔喺度仲啱,細佬,早兩晚你個Maria喺你房唔扯,唔關我事,我係驚你兩個加埋百幾歲,就大安旨意,真係手尾長嗰陣,你兩個點算?」「唔會……」「點解唔會?」「我紮咗。」「點解我唔知㗎!」「我紮咗要話俾你知,有利市要封俾我呀?人哋跳橋,人哋扮鍾意番男人你都知咯。」「你唔似吖嘛……」「唔似乜嘢呀?男人有紮冇紮有個樣嘅咩?」「打得少呀你……你兩仔爺聽晚夜機,成十八粒鐘,你唔好同阿BB拜拜,你搞喊咗佢,我哋兩個女人就成晚唔使瞓……」「你俾咁多時間我哋幾個,你俾番啲你自己……」家姊九秒九就塌檔,「我仲有乜好望,個仔要成世被迫走路,個孫都要分頭去讀書,呢個伯爺婆,臨老以為好醜都搵到個真心嘅,點知阿拿督佢真心到,情願早啲俾晒所有嘅嘢過我,然後就莎翁喇拿,行先一步……我淨係想見到BB好,見到佢大個女,我實冇命見到,你都未必有命見到,所以我哋要俾心機見一日過一日……」

酒店大堂上下的人,對這些情境,詐作不知,瑪莉亞和孝活早已回來,不動聲色。

許志安 馬國明 鄭秀文
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2020/12/21kam01a--20201231064605-971x1024.jpg