為誰辛苦為誰忙的，拿督夫人潘斯理，我等敬畏的哎吔家姊，ＢＢ妹的婆波，看來踩盡了油門，這個禮拜扭轉乾坤，打救我們的七級浮屠，配額用得八八九九。於是我和瑪莉亞宋，孝活，分別見到她幾步路都氣踿踿，額頭電車路，橫又有直又有，見椅就想坐，這些算不上是警鐘，總之，贏得我們真心愛上她的人，開始洩氣，開始走樣。今日本有四五個項目，死掙到第三件是去古埃及油畫慈善拍賣，噱頭是有仿製十個八個羅馬統治期的帝國家臣肖象，每幅挖去雙眼位置，善長可捐款五百令吉馬幣，任擇巨畫人頭後面獻上自己雙眼，由官方攝影造像。推舉家姊做埃及妖后Cleopatra，實至名歸，ＢＢ妺找到碧眼公主，她納入的雙瞳睜爆空框，宋小姐居然跟古代美人有得揮，孝活興致不大，連眼鏡一齊贈興，到我千揀萬揀到一個鬍鬚佬，我瞪大雙眼，反而毫無霸氣，似一代諧星。擾攘一餐，折合善款港幣五千埋單，本來家姊要賠上為真迹喊價的部分打氣，但也罕有為精神不振而放下捐款支票離席。
自然眾臣子亦車亦步亦趨直至女王在酒店牀上攤抖。
「弊！阿Beatrice呢？阿ＢＢ妺呀？」幾乎想落地但又力不從心。
「味跟阿師弟架車囉，我見佢哋呢幾日都好開心，味有得佢哋一架車囉。」
「唔係咧，今朝我至鬧咗佢一餐。」
「不過我哋都返咗嚟咁耐咯。」話口未完，我去開門的卻是孝活，為家姊御用的本地中醫趕泡一壺中藥而留後。
「點解佢同呢幾日一齊個女人，喺大堂嗌交嘅？ＢＢ妹係味返咗上嚟啦？」
「吓？」同時三個人都發出這個反應。
「我去搵佢，你哋俾劑茶阿家姊飲先喇。」
「我同你去！」
家姊突然還魂一樣跳落牀，「我殺死佢呀，佢俾個衰婆搞到魂魄唔齊，Maria我同你一齊搵ＢＢ，你兩個打落去總經理發散人……」連拖鞋也不穿就跌撞而去。
衝出這間總統套房的大門，幾乎碰跌靜靜站在門前的人仔，兩個女人都嚇了一跳，不顧一切爭着抱起ＢＢ妺又攬又錫。
「做乜咁陰功，識得一個人嚟到門口企喺度。」
「我……口渴呀……」並無一副失蹤人口的驚青樣，只是被待慢的鼓起泡腮。
「乜你幾時識講口渴㗎？」看得出這個宋阿嫲仍未驚魂甫定。
「你兩仔爺喺度睇戲呀？」家姊殺氣騰騰未過。
「呢位小姐，過嚟吧枱呢邊，我開杯cocktail你飲好唔好？」孝活與ＢＢ冇大冇細，但又應棍。
「不過又真係神奇，佢點會上到嚟呢度頂樓，戇居居識得搵到呢間房門口，但又唔夠高撳鐘，唔怪得知咁嬲爆爆喇，ＢＢ呵？（門鈴響起）係味個兇手搵到嚟呢？」
又惹起家姊把火，「房冇雞毛掃呀，叫House keeping是但棍又好，士的又好，即刻同我班枝嚟呀，我仆濕佢呀！」
門開果然是面青口唇白兼內疚的師弟，我作狀要打他一拳，「冇人噃？」隨即單眼搖頭示意他鬆人，「家姊劑茶凍啦，上牀飲咗先喇。」
兩個女人看着ＢＢ指揮孝活在冰箱尋寶，這時青筋才消退。問心一句，我又何嘗不是扮鎮定。
2021.01.10
2.2k2021.01.10272021.01.09472021.01.09225
11 小時前
14 小時前
15 小時前
18 小時前
2021.01.10 
甘國亮
