Advertisement
甘國亮.連載小說

甘國亮:你都有今日——話事啤

專欄
2020.10.31
124
撰文:甘國亮

12kam01a

BB妺的一歲生日慶典,由三個大人操控,不必跟隨出世紙的十月三十號,她媽在手袋翻出該從未公開的法定贓物,我仍未將忍者功破戒,無射籬眼偷𥄫BB以及雙親姓甚名誰。宋瑪莉亞和孝活明知身在大馬的哎吔家姊,早兩日已快遞巨型紙箱過來,內容必定要乜有乜,驚天動地,所以籌備委員一切從簡,晚飯後由小蛋糕撐場,孝活用才華搭夠,手風琴拉出快樂生辰,BB妺立即雙掌拍枱配合節奏,繼而與其母大會攝影師唱雙簧。
「多謝邊個呀?」
「媽媽!」
「唔係媽媽,我係嫲嫲,呢個有鬍鬚嘅呢?」
「PK Uncle。」
「發音好正噃,係咪練咗成日呀?呢個人夠有鬍鬚咯。」
「佢冇多鬚鬚,佢有眼鏡,佢係拷鑊粥粥。」BB妹其實早就有應酬的會話藏在肚裹,儲夠在今晚開齋。「呢間屋咁大間,係邊個送俾阿BB㗎?」孝活將紙箱頂揭開,舉起BB假將她放入去,「快啲多謝邊個呀?」
「多謝婆波,婆波幾時返嚟呀?」還加送向着手機作掙扎的身體語言。
「乖咯,婆婆有錄咗音同我哋傾偈呀,聽咗先至拆禮物喇。」
「睇吓阿家姊錄咗幾長?分分鐘仲長過拆晒啲禮物呀,邊個要去廁所好去啦……」
天佑我王開始,眾手持叉碟含蛋糕聆聽。
阿BB妺快高長大呀,婆婆錫晒你吓。嗱,我呢,想你哋四個,三大一細𠱁吓我開心,阿拿督呢,佢唔俾我返香港呀,佢話,除非我趁呢排大家都冇乜嘢做,就不如趁天氣都幾好,就……就啱人人都行得開咯,吓,咪一於,你哋都估到佢想點㗎喇……
這邊,眾卿家愈聽愈坐直身子,哎吔家姊甚少含欖般,少女情懷總是詩,孝活笑到蛋糕從口角噴出來,宋瑪莉亞同BB像心領神會,剩下我覺得還有高潮湧現。
嗱,佢畢竟有頭有面,我又原來仲有好多老影迷係喺大馬呢便,唔求其得㗎嘛,快快趣趣,都要兩三個禮拜喇,諗起都頭痕,嗱,人一世物一世,阿Maria你就同公司請個長假,行唔開就當我係你個客,同你哋喺我呢便買疊別墅,乜嘢價位都得,話唔想得失我呢個大客,咁咪甩得身囉。阿Howard仔我知你好踏實嘅,我叫阿拿督安排一餐飯同啲大使呀,國際基金呀,支持吓你咁落力啲北歐嗰幾個國家啲文化事業,包你唔會空手而回。至於阿細佬呢,我知你聽到打喊路,瞌眼瞓,嗱,我俾隻牌你上,唔好咁大鼻喇,阿Maria,我代佢𠱁番你,你兩個可以趁高興,咪嚟吉隆坡註冊兼中式又得西式又得,橫掂我個籌備團隊多人多到震,包冇甩拖。仲有呀,呢度啲教育制度啱晒阿BB妺自細有好學府,愈講愈着緊過我嗰筆呀,阿BB妺,有冇份聽到婆婆我講乜呀?……
BB妺竟然放下禮物,有如家姊潛伏之馬仔,立即拍掌又跳又笑:「婆波……婆波呀……」見過大小風浪局勢的我和瑪莉亞,此際都似整容失敗,五官失職,懵口懵面。
孝活還火上加油,與BB搶拆大小禮物,「嗱,阿Auntie婆婆,呢次其實係借花敬埋佛,你哋知唔知,佢有一次試探我,問我覺得宋小姐點,話如果我同佢行埋,咁,佢係我老婆你新抱,阿BB變咗你個孫,咁咪一家人見多啲又得,見少啲又得,我估唔到Auntie婆咁開明,嚇到我鼻哥窿冇肉……」
「你係咪打得少,呢位小姐,你近佢,你側邊咪有枝棍,你同我仆濕佢!」

鄭秀文 關智斌 許志安
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2020/10/12kam01a-20201029081339-150x150.jpg