Advertisement
甘國亮.連載小說

甘國亮:你都有今日——酒後吐真言

專欄
2020.05.30
72
撰文:甘國亮

90kam01a

哎吔家姊瑪莉亞,最醒目是將今日唔知聽日事,瞓完一覺識得起身,已經為自己編好連續劇的情節,鋪鋪出人意表,有頭有尾。單是去大馬為師父賀壽,操勞了幾日,原來順手佈下天羅地網,重拾與上個世紀的臣拿督的舊情,暗盤早知對方過港有期,也提前回來,出席二人理所當然再度碰面的舞會,弱智的觀眾讚美為天賜良緣,但這兩個演技不慍不火的人瑞,撰寫共演的好戲連場,實則也度到身水身汗,看似終於得到一夜風流做壓軸,但冒險成分高到似殿堂名宿,心臟病發於舞台上的高潮戲。

「師弟呀,你細過阿易老闆咁多年,佢又叫我家姊,你就學我個仔成家人,都叫佢做大伯先生,你都唔爭在喇。」「好吖好吖,師姐最叻教我哋點做人,以前喺片場,佢幫導演解畫,逐個分配啲大牌細牌做乜嘢,個個都五體投地㗎。」「家姊我同你掛高張畫,今晚至𥄫到你原來仲有個藝名叫王蘭馨,冇人話過我知呀……」「唔好意思呀,阿大伯哥,係玉蘭馨呀,你睇漏咗一點呀。」「人哋大伯哥係番書仔出身嘛,我呢度咁Romantic咁幽暗,佢邊睇到嗰一點唧,我幅畫露兩點就話啫,細佬呵?」「家姊我邊有你講到咁鹹濕……哈……」各有各發出不同品種的笑聲。「師姐啲藝名多到我都數唔切,英文名都期期唔同,我啲英文又吔吔烏……」「我自從篩剩Maria呢個,又冇蝕股票又冇小人,就一於係咁,啲乜嘢約瑟芬呀,要做拿破崙情婦喎,夏娃就衫都冇件,莉莉就好多舞女都興叫嘅,本來伊莉莎白都好嘅,女王咁拜,但諗落瑪莉亞仲巴閉,聖母喎,又唔使落台俾人篡位嗰喎……好,趁我飲晒呢樽之前,你一個唔好返過去,一個就咁夜不如就喺度瞓,我講講吓瞓着就唔好追問,睇個樣冇咁快叫我去報到……」「大吉利市。」「你急口令咁味得囉。」「同你有關㗎,我就係趁你兩個坐埋一齊……」「師姐,早啲休息喇,仲有Van仔嘅……」「撞鬼咩你,你以為我咁得閒介紹個筍盤俾你……」「家姊你快啲飲埋呢杯入直路。」「嗱,我個仔阿蓋紀,你假假地都救過佢哋成家,佢仲行大運,間接都有救埋我……」「是但喇,入直路入直路。」「我啋過你,入直路,咒我快啲去報到呀?」「唔敢唔敢,鍾意我同你跳part舞先。」「我聞到陣除,我個仔有啲蹺蹊,佢味去咗咁耐敘利亞,又去美國好頻撲嘅,個世界冇得救㗎啦,佢對人人都好,一早就出蠱惑割開咁大忽地,萬一前面大屋有乜要走路,後面成半畝地係我嘅,我都好錫佢,佢冇你咁聰明,但死好命……你兩個做乜唧?我就講完㗎啦,阿細佬,我睇冇咁快要冚家剷嘅,點都有兩三個月貨仔嘅,到時,阿Ben仔就送去美國讀書,大把人欠落我哋人情會照顧佢,我個新抱多數劃清界線黐外家,你呢……」「唔使理我,我會飲滴露,不過驚冇貨。」「Shut up,我個衰新抱最鍾意講shut up,阿師弟,我同阿大伯咁啱key,就係佢癲得好勻循。」「咁師姐你有我,未死嗰日都會照顧你吖嘛。」「咁萬一你死先呢!」「咁又係,阿家姊你個相好架勢,似係會見證香港陸沉。」「我真係想瞓啦,嗱,呢笪地同後面呢間屋,係我個名嘅,師弟我買俾你响青山養老嗰間屋,會正式轉你名,你唔好嫌啦,而家周圍咁多發咗癲嘅人,冇人得閒要去青山㗎啦。」「好,飲杯家姊。青山喺屯門裏便嗰呵?佢唔要你就叫阿師弟……你真名係乜呀?」「好快一出事嗰陣,我哋三個會有人查,改定啲暗號都要,細佬同我改定多個英文名喇。」「叫碧姬芭鐸喇,安全呀,而家冇人知佢係邊個。」「我係做黃天蕩套神功戲跌跛嘅,就用呢個名喇,可以打醒精神做人。」「我唔使改喇,呢幾年我都俾人查到冇嘢好查。」「我講咗成晚,都係想過好嘢俾過你之嘛,講真吖……喔……飲晒㖭……」「為咗家姊你愈講愈真,我哋開多枝!」

關智斌 許志安 黃心穎
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2020/05/90kam01a-20200528071929-1024x1008.jpg