Advertisement
甘國亮.連載小說

甘國亮:你都有今日——撩者先賤

專欄
2020.05.02
59
撰文:甘國亮

86kam01a

養大了的女兒,說是蝕本貨,不算刻薄。人海茫茫,如果任由她自把自為,將肉體和餘生,掛單在地球上另一主的人家,賭一鋪大細,不離兩種極端收場,一就局做寄人籬下的受氣包子,二就做恃外家財雄勢大的癲雞。白頭偕老這條戇居大道,又要抽時間去變心,偷情,通姦,離婚,爭產,奪子,一句講晒,嫌人生太長,得閒得滯。我的二女Isabelle,英文名由死鬼老婆未經我核准,擅自在入幼兒園用作報名,我特登叫大眼妺做醫沙包,童心無忌,同我這個成日督她肚臍當沙包的老竇,無大無細。直到有一天,我不肯定這是她初戀還是第一鑊失身,對方簡直與我是死敵,有如以色列遇上阿拉伯人,我想聽到沙包每一句真話,都要解碼,沙包叛變冇得醫,像漏斗一樣,似那些冒起的大明星,反面跳槽到另一個經理人的大公司,直乘老死不相往還,我蝕到血本無歸。

今餐下午茶到橫廳,被汽水蓋老婆逢掃球裝彈弓,必定事出有因,頭陣先質我有份縱容讓Ben太子帶補習姐姐返家入房閉門補習,平時我死人都講到翻生,今勻淡市大贈送,卸落學是非的奸細菲傭身上,誣捏我這個用心良苦的大伯先生,好人當賊辦,蓋少奶剎那無法連消帶打,開波幾分鐘經已一比零。

「唏,講開話聲你聽之嘛,佢哋仲話讀過大學讀過護士我先請㗎,成日我最趕時間就講啲無聊嘅嘢,仲有呀,話阿Mr大伯成日冇著褲周圍行嚟行去喎,我即刻嗌Shut up,你再講啲咁肉酸嘅嘢,我即刻叫你唔好再喺度㗎吓……」這潑貨還要跌落地揦返拃沙,最後索性指桑罵槐,只欠四目交投增加力度,我非常感謝她贈送的上聯。「唉,嗰個撞車,爭啲害到連事頭你都冇命個司機呢,冇咗一隻腳,一隻腳至喎,執身彩喇,但呢個女子,唔知我係邊個,梗係唔順超,味搵機會砌我囉,以為我搶佢個情夫份工……」「你點知佢哋有嘢㗎?」「你哋阿Benedict講我知我至知㗎咋,唔好吖嘛,十幾歲細路哥見屋企咁都得,你話我哋點教,好彩你快手叫佢哋一啤執包袱……」「吓?你又咁都知?」「哦,你家婆,你奶奶講嘅,佢住喺後花園都知咯……」馮素裘未到中場連失數球,唯有落荒而逃。「弊嘞,我原本有阿Isabelle啲緊要嘢講你知嘅,變咗講晒啲無謂嘢,我要出中環呀遲晒大到啦,你食多啲,唔好嘥嘢……」「邊個伊莎啤呀?」本已急起身急步走的敗將,回半邊面攞個彩。「你唔好咁喇,點都係一場父女,佢有幾句說話成世都冇同你講過,或者話晒我都係佢半個契媽……」「契媽味契媽,邊有半個㗎?你快啲行喇,得閒响手機講嗰幾句我知味得囉……」下半場斬纜,我得意不饒人。「仲有呀,最緊要呀,你幫我一個忙,叫邊個見到我冇著褲周圍行嗰個,用手機猛影低佢,影多幾張,講冇用𠺝,俾你還我一個清白……」我窮追猛打累她幾乎四吋高踭鞋拗柴,上天加送甜品,容光煥發的高堂瑪莉亞操入來撞個照面。

「你趕去邊唧,喂你咁多靚衫唔著著呢件,冇波冇籮,你睇吓我,今日好似偷咗你啲衫著咁樣……」長者經已刀下留人,受創的傷口再被撒鹽,還懂得向家姑面頰吻別。

我們兩個俠侶,大材小用,要尋尋覓覓,整治心懷不軌的人,才是濟世為懷。

 

黃心穎 關智斌 鄭秀文
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2020/04/86kam01a-20200430071739-1024x547.jpg