Advertisement
甘國亮.連載小說

甘國亮:性相近 習相遠

專欄
2019.11.02
141
撰文:甘國亮

60kam01b

物極必反。作為心理治療的醫生,一樣會得到心病的傳染,十年八年來的社會變遷,影響甚至摧殘了我自視為藍籌股的信念。
轉眼幾個月以來韓娜與卡宦這對俠侶的神化,令我像追看連續劇,稍稍想不通,他們會否恃着膽正命平而遇害,二人兩狗一家人在首爾歸西,貨比貨,放眼存活指數插水,我已比他們更堪虞。
追劇應視乎產品的出處,往績,和製作背景資料,先行調校好自己的欣賞水平,刪除智商有別的觀念,稍有智慧的人都不棹忌劇透早來一步。於是就確保互不拖欠,總有得着,魚水共歡。數個晚上,我都用兩公婆傳來的手機錄音,反覆作催眠,含笑,疾醒,再轉姿勢……
「我哋唔恨返嚟啦,因為託晒人士,使晒黑錢,先至話俾我哋知,韓國屬於狂犬病區,如果要直接帶兩隻大狗細狗返香港,係要困响漁護署坐監三四個月,你日日去探佢去陪佢,你同佢講乜,佢點會明,好多都係咁冇心機到病咗,等唔到放返出嚟就瓜咗老襯……諗起我又想喊,好彩佢哋而家瞓咗聽唔到,衰佬你同阿Doc Yam講住先……」「使乜喊唧,我哋而家咁,唔係好開心咩,阿淫醫,我哋好唔得閒呀,掛住發掘呢兩隻仔嘅潛質呀,早兩日呢度阿白金星呢,即係阿『核開發情報之父』個契仔呢,突然開車嚟接我哋一家大細去濟州島喎,話就話嗰度係蜜月之島,仲有個漢拿山,哈……同我老婆個名一樣……但成程車猛講七十幾年前有個四三暴動事件,死咗成六萬人有多冇少呀,啲狗仔聽聽吓都瞓着……」「哎吔人哋Doc Yam而家嗰邊未煩過咩,仲講埋晒呢啲嘢,阿白金星間屋呢,喺個樹林好似迷宮咁,但兩隻嘢即刻就俾佢𥄫到,話佢哋係受過特工訓練嘅,我兩公婆咁大膽都冇周圍逛,擔心緊佢哋,貶吓眼就失咗蹤,冇聲冇氣,做戲咁,竟然唔知點解會揸住架車返嚟……」「仲識去人哋個書房捎啲書嚟睇,睇到眼定定,唔係睇公仔喎,幾巴閉呀。」「都擔心㗎,俾我哋掩護佢哋離開,都係亡命天涯㗎嘛,我哋十五十六,情願飛去曼谷前後右左右匿多陣先,橫係掂係,等佢哋同人仔哥哥住一陣,睇吓夾唔夾都好吖……」
✽            ✽            ✽
「淫醫阿淫醫,我哋頭先真係唔好意思,突然啞咗咁,我哋其實一直唔好意思,Sorry。」「Sorry, DocYam.」「舊年阿老婆由突然話去曼谷修乜嘢禪,其實匿埋生仔,邊呃到我,但佢當我唔知,我當佢唔知,輪流突擊去睇個BB,high到冇人有,兩公婆望實對方講大話,又爭啲穿煲嗰種,嗰種high法,有錢都買唔到……」「Doc Yam,我都有搵你笨,又要講個秘密你知,又要唔准你講俾佢知,係好過癮㗎,睇吓你會唔會出賣我,靜靜雞爆俾佢知,就算佢真係知咗,又睇吓佢可以忍幾耐,嗰種成日恨𥄫實佢對鬥雞眼,嗰種high法,仲襟睇過以前佢追我嗰陣……」「我哋個BB到而家都仲未拗贏改邊個名呀。」「不如你做佢教父,你改,我哋兩個慳返唔使拗。」「BB都好臭脾氣,我摸吓佢,佢都用手仔格開我……」「所以我咪話一齊喺曼谷叫佢哋三兄弟相睇吓先,睇吓夾唔夾先,阿教父,我哋送個度假package等你一齊過去喇。你嗰邊咁搞法,唉,都係有排搞㗎啦,嚟睇吓我兩隻狗狗有冇啲特工職業厭惡症仲好喇……」
我半睡半醒,又重溫了尾段,二人鬧笑的動作片段也錄下來,「頂きます……頂きます」,開波前你敬我一尺,我敬你一丈,這句日本人用膳起筷前的進行式宣言,「我唔客氣啦!」用廣府話說出來,力度要恰到好處,狼胎與幽默兼備。

黃心穎 關智斌 許志安
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2019/11/kk-150x150.jpg