甘國亮.短篇小說

甘國亮:불가능한 임무業餘特工隊

專欄
2019.10.19
84
撰文:甘國亮

58kam01a

在病人名單中,沒有一個比韓娜貼錢要她上來給我半價贈診的花拉,更乞我憎。每次打尖,滿腦子都是損人不利己的問答題,體臭口又臭,未等得到她肯消失,助手和我已忍不住要開窗,扇入較新鮮的空氣去義助空調,根據清潔阿姐申訴,此人壓軸的劣行,一定會如廁之後拿走一卷新簇簇的廁紙。外科醫生診症不戴口罩怕被傳染,想起她我就要借姪仔非主流酷族的防毒面具作後備。今日是新潮派破日,她又突襲,穿戴的又是韓娜的過季時裝和手袋,還擲了個藥瓶在桌上。

「呢樽係阿Hanna叫我去梅窩搵俾你嘅中藥,乜嘢便秘都搞得掂嘅,你唔使俾返錢我,我仲爭你三次定四次診金,求其喇,就咁算喇。」

「我冇嘢,冇需要食啲咁嘅嘢,佢做乜要話你知,佢兩公婆唔係响首爾未返嚟咩?」我也難得擔心這對鴛鴦是否經已在異鄉遇難,數天都收不到他們煲粥的語音信息。

「嗱,你呢度冇CCTV吖嘛?佢吩咐我要壓聲同你講,佢話自從喺嗰個特務地下集中營,救走咗嗰幾隻想偷走嘅狗……呢度真係冇人聽到吖嘛?✽∼∧✽♯x……∼∧……」

「我唔識睇嘴形㗎,你一係就試吓用手語嘞……」廣東話的俗語「火都嚟」,此刻最貼切。

「總之我一句講晒……」

「你真係一句先至好呀!」原來除了吸煙有助大解,與這種人也可促成三扒兩撥起程想去速瀉。

她也暴跳想取回藥卻又再用力擲回:「唔係俾面Hanna我真唔益你呀。佢話响首爾好似有人跟蹤佢哋,所以要猛搬酒店,啲蒙面人主要想捉返嗰兩隻特務狗,佢兩個亡命天涯緊呀,仲話乜嘢交心朋友,等你响度仲咁聲大夾惡……」要刺激到這個女人變癲狗,只需要九秒九。

「咁你又咁大聲喺度報告新聞呀?樓下遊行啲人呀,咁遠都聽到你講乜呀,我唔使你樽嘢,我而家就有得去屙啦。」我大踏步直趨男廁,但更惹癲婆飛撲尖叫咬着我的衫尾。

「佢哋話,你識好多三山五嶽,叫你做包抄,等佢兩公婆一家四口可以甩到身走到返嚟,我冇你咁好氣,佢話發覺手機啲口訊會俾人同時𥄫到,淨係可以搵到啲南韓欠佢人情嘅老友,幫佢度橋……我都唔知做乜鬼要講咁多你知……總之,你記往,佢會失驚無神搵到個冇人偷聽到嘅電話,就直接打俾你,如果佢發現有人偷聽,佢就即刻收線,班過第二個電話再駁落去再講過……你屙飽佢喇,話知你哋吖……」

癲婆花拉一口氣如莎士比亞舞台劇般一字不漏,暢順程度與我輸出落廁坑的硬物軟物鬥大聲,叮噹馬頭。嚇我一跳,她再回來在廁門外低八度音頻呢喃。

「你哋如果覺得唔對路,密碼係講一句,『我大緊便呀』,就即刻收線……」

「大佬,我聽唔到你句pass word 呀……喂……」我運作未完,無暇追出去。

✽            ✽            ✽

未夠三分鐘,手機來電,下意識是韓娜,我由得褲子滑回地上。

「哈哈哈,你唔好講嘢,你做乜激到阿花拉喊得咁淒涼。我頭先竄落去間最老字號嘅『新世界』shopping呀,我五分鐘就搵到十幾件啱兩隻『曳嘢』嘅……帽呀,小睡袍呀,跟我嗰隻好大份,德國牧羊犬嚟㗎,識偷酒飲㗎,竟然有啱佢著嘅軍褸軍靴,同過頭笠嘅『辜持』面罩喎,哈哈,阿衰佬話改乜名好呢,我話你係老竇,個仔咪叫佢衰仔,另外嗰隻係拉布拉多,仲未肯定係男仔定女仔,嗰個喺建國大學嘅獸醫話而家係可以變性嗰喎,我都未聽過,搞清楚之前我買啲中性嘅衫佢著,佢兩個陰功,陪我哋走難咁,半夜點都要落去散吓步㗎嘛,又要化晒妝戴晒帽,一認出捉返佢哋我實喊死,你唔好見我把聲而家好歎記咁,我……叫阿衰佬用法子傳我哋响酒店張合家歡過你睇……江南個magic hour好特別……你手有冇筆呀……」

「我……大緊便呀……」

「得!即刻收線! Over!」

鄭秀文 黃心穎 許志安
人氣 TRENDING
鄭秀文 許志安 黃心穎 蔡一智 馬國明
https://www.mpweekly.com/entertainment/wp-content/uploads/2019/10/58kam01a-150x150.jpg