周杰倫（周董）一向鍾意玩魔術，無論上節目或與朋友見面時，都會即興露兩手。噚日（14日），周董約咗林俊傑（JJ）、吳建豪、柯有倫等聚會，期間佢又獻技，同大家玩「讀心術」。
周董於社交網分享影片，片中JJ先喺手機揀定咗一張圖片，然後周董要估出相中物件。周董只係問咗一個問題，即估到對方嘅圖片係「雞塊」；到吳建豪時，周董亦馬上估中「蝙蝠俠」，高超嘅魔術技巧令在場所有人大叫厲害。而五月天主音阿信亦留言挑戰：「哥中之哥，換我找圖給你猜。」周董則搞笑回應：「來！你很好猜。」
今日，周董又於錄音室同魔術師朋友陳冠霖交流，佢望住陳表演燈泡魔術，但對方就取巧地手持開關掣扮聲控燈泡，周董即話：「燈泡魔術不是這樣玩的。」
佢扭出燈泡，然後彈出簡單音符，神奇嘅係燈泡竟識隨旋律開關。網民都驚歎：「被音樂耽誤的魔術師」、「哎唷太神啦」、「如果是地表最強的魔術，那當然要魔術巡迴！」
圖片來源：周杰倫@Instagram