MIRROR成員邱傲然（Tiger）昨晚（27日）舉行一連兩場《Where It Continues “Live 2026”》Part 2頭場，相隔三個月再踏同一舞台，Tiger以結他自彈自唱《Live the way I want》及《吃腐肉的鷹》揭幕，瞬即燃點全場氣氛。他之後搞笑地指要飲水，卻發現台下觀眾沒有反應，隨即笑言飲水也是「表演」之一，這次成功引來全場大叫，他更向新觀眾講解規矩：「新嚟嗰啲都唔係好知規矩喇，唔知規矩就問知規矩嗰啲，要嗌得好勁、跳得好勁！」
整晚Tiger除了展現結他功架，更獻唱《First Love》、《漣漪》及《寂寞的男人》等多首歌曲，而妹妹Kelly再度出任鍵琴手，更自彈自唱個人原創英文歌《Vase》，贏得全場掌聲。當唱到快歌《將冰山劈開》時，Tiger高呼「好熱」，隨即脫去外套以黑色背心亮相，其後唱《相對濕度》時更走落台與粉絲近距離接觸，令現場尖叫不斷。快歌環節過後，他感性表示：「咁樣就三個月，三個月前就喺呢度開咗我人生第一次嘅concert，估唔到咁快三個月之後就已經有Part 2，我覺得好似向前行咗少少，真係好值得感恩，尤其係睇完Part 1再睇Part 2嘅你哋，同埋Part 2入嚟睇嘅你哋，令到我哋覺得好幸福。」隨後，他以《由零開始》、《脫兔》及壓軸的《ALRIGHT》，順利完成演唱會。
Tiger在演出後坦言短時間內再開Part 2，心情既興奮又有壓力，「始終歌唔係多，但團隊大家都唔想一模一樣，所以都要喺僅餘嘅時間諗一啲新嘅嘢。」提到妹妹Kelly再次登台，他認為這是一個很好的平台讓她展示喜歡的音樂，至於妹妹會否考慮入行，他說：「佢其實好多自己嘅創作，但係咪要好official咁樣擺去一個平台度，要去簽公司？呢個我諗佢暫時都未諗到，因為佢仲係一個學習嘅階段，我覺得佢而家嘅狀態，佢自己都自在舒服，所以就俾佢自己讓子彈飛一會。」他更笑言妹妹的創作水平比他高階，一直「利益輸送」向妹妹邀歌，但好聽的作品妹妹都留給自己；至於今次妹妹是否有酬勞，他笑稱這單不是他負責，自己只提供「情緒支援」。Tiger被發現手臂通紅，他解釋因近期太疲累而接受了刮痧，叫大家放心。
提到是夜演出表現，Tiger笑言今次在記憶歌詞上比Part 1有進步，但結他技術仍有待改善。早前他在節目《8點直樂VIURIETY》中獻唱陳百強經典名曲《漣漪》後引來網民負評，他直言這晚再唱此曲時壓力極大：「梗係有啦！（畀自己幾多分？）分數好相對，一定可以更加好。」被問到是否想平反，他坦然回應：「我諗冇上次咁緊張嘅，但真係仲有好大嘅進步空間，自己知自己事，做得唔好就會畀人批評，係好正常，咁就繼續練好啲。」
將於下月3日迎來27歲生日的Tiger，透露演出後急需休息，身心俱疲下已計劃去旅行充電，但不會透露目的地，「可能遲啲你哋會知。」又打趣說妹妹節目比他多，所以不會同行。他亦提到父母到場支持，睇得相當開心，但笑指父母睇騷都很喜歡喊：「可能佢哋感觸同感動。」對於唱《ALRIGHT》時亦眼泛淚光，他說：「每次都會有，尤其係大合唱，又係自己第一首歌，一定會有感動，同天衡（音樂總監）一個對望都明白係得來不易，好感恩！」
