樂隊「Locksmiths開鎖佬」近日推出今年首支派台作品《陪我去台北》。踏入2025，Locksmiths繼續熱血向前衝，歌曲由樂隊成員親自作曲，讓大家感受他們的音樂風格。延續去年的出道作品《我們都是這樣沒有長大的》的青春感，歌詞由組合「YEAHS」成員少爺占操刀，將年輕的任性和揮霍寫進歌詞，歌詞中隱藏了不少台灣情歌，包括《愛我別走》、《簡單愛》、《旅行的意義》與《不求月老》等等，就像青春的密碼，永遠能勾起大家的回憶；而編曲及監製則由「YEAHS」另一成員何兆基主理。
MV方面，Locksmiths專程飛到台北拍攝，更邀來好友歌手洪助昇（Aiden）擔任MV導演，以年輕的視角呈現台灣最有魅力的一面。Locksmiths指歌曲的靈感來自，是因為近年不少香港人都喜歡於周末來個快閃旅行，所以希望利用這個熱潮作為歌曲背景，「講述五個香港大男孩快閃去台北追女仔；至於歌曲風格，作為第二首出道派台作品，我哋希望嘗試用另一種曲風，令聽眾認識我哋，加入咗funky元素，令成首歌感覺調皮同青春活潑啲，希望能夠令歌曲同MV成為一個小故事。」
飛到台灣拍攝，Locksmiths慶幸得到公司支持，不過由於留台時間不多，所以拍攝行程緊湊，「最難忘一定係我哋需要跑動嘅劇情，因為故事講述我哋五個一齊『追』同一個女仔，拍攝當晚，我哋由夜晚十點跑到凌晨三點冇停過，跑過唔少台灣景點！隻腳隔咗幾日返到香港，先至覺得酸痛！不過一切都值得！」問到最喜歡的一幕，五人不約而同地表示放煙花，「一定係喺十份放煙花同仙女棒嘅一幕，因為我哋當中有幾個成員都未放過煙花，真係體驗到嘅時候，感覺好震撼同埋難忘！」
至於首次擔任MV導演的Aiden，直言最大挑戰是「冇得睇景」，「因為地點係台灣，所以好多都係憑自己之前對台灣嘅印象、去過嘅地方，同埋上網做research。一去到就直接拍攝，雖然時間上比較短，但最後成個作品我都覺得滿意。」而最難忘的事，Aiden同樣指是Locksmiths由夜晚跑到凌晨的場景，「當時佢哋有兩位成員病咗，但食完藥都繼續落車跑。我記得有一日諗住早啲收工，俾大家休息吓，但佢哋同我講『得㗎喇，Aiden，我哋繼續啦』，所以我對於佢哋呢份毅力、堅持去想完成一個好嘅作品，好難忘，我都希望呢首歌可以令到更加多人認識佢哋。」拍完這次MV後，Aiden指有機會的話，會再向導演方面發展，又笑說：「歡迎公司搵我包攬晒全公司歌手嘅MV，我隨時候命！」
