二十五歲的音樂才子Gareth.T湯令山，因《勁浪漫超溫馨》開始讓樂迷認識，同時他為歌手包辦曲、編、監不少佳作，如容祖兒的《九秒九》、姜濤的《Master Class》與鄭欣宜的《我地》等。
今年密密出歌的Gareth.T，早前推出的《用背脊唱情歌》唱到街知巷聞，不僅旋律與黃偉文的歌詞功不可沒，加上唱片公司的大膽宣傳贏盡話題。
Gareth.T推出的歌曲《國際孤獨等級》、《緊急聯絡人》與《用背脊唱情歌》都滲出陣陣苦情味，連世巡的主題都稱為「Prince of Sadness」，他一臉認真地說︰「因為心傷囉，同埋呢兩年都出咗好多傷心又心傷嘅歌！其實首站是英國、第二站是澳門，兩個都屬於比較有歲月嘅場地，其實本身諗住叫《Renaissance》，即係文藝復興，但係大家就覺得比較難記。」
除了音樂，大家都知道Gareth.T是時裝精，他亦承認自己有少少貪靚，最怕俾人見到打完波成身濕晒，俾人叫合照，「已經成身濕晒，搭地鐵返屋企，跟住嗰啲線眼就會俾人影到，個頭又亂晒，貪唔貪靚呀？少少囉，可能六分囉，可以再貪靚啲，但係我唔會！」
紅館是一個神奇地方
說到今次世巡的歌衫，當然由Gareth.T親自負責，「每次出騷的歌衫，我都會給予意見，演唱會衣服我都會諗，poster大家見到套衫，比較古典少少，西班牙風，concert可能就會輕便少少囉，我諗緊可能會著啲白色系列，有啲Baroque（十七世紀歐洲藝術風格)，我想整個concert入面嘅衫，大部分都以白色為主，會有玫瑰花，不過暫時未搵到，通常我有idea就會搵啲reference，有時候可能搵到個設計師，就直接問佢，可唔可以借衫囉！」
Gareth.T特別為澳門站準備全新設計的舞台，將倫敦站原汁原味的演出內容升級呈現，可以說是「限定」形式舉行，他解釋︰「澳門站個舞台，應該係大少少，同埋因為澳門近香港，所以好多香港朋友都可以睇到，加上十二月澳門站已經出咗啲英國站未出嘅歌，rundown會加埋落去，所以會有唔同！」
至於香港站，Gareth.T早前已講明想於紅館開騷，他說︰「香港就應該要下年先有，呢個tour未必會走香港，所以香港成事的話，又係一個全新演出，我好想在紅館搞，唔關場地大定小，係紅館呢個地方對我嚟講，係一個好神奇嘅地方，由喺嗰度睇球賽，第一次演唱會睇方皓玟，我記得佢俾我個位好近，前到我睇唔到佢，我覺得對我嚟講，對紅館嘅感覺，可能同其他歌手有少少唔同，因為我中學、大學嘅時候，都比較少聽廣東話歌，我知道有呢個地方，但其實對我意義唔係咁重大，反而覺得做演唱會嘉賓嘅時候，我終於明白點解一定要喺紅館，我記得第一次係做張敬軒演唱會嘉賓，喺下面升上台嗰刻，已經聽到啲觀眾勁大聲，嗰下好深印象！嗰一年做咗三次嘉賓，每一次唱完，我都喺紅館行下蕩下，睇下呢個地方到底咩料！」
今年Gareth.T密密出歌，每次都能夠製造話題，新歌《泥菩薩》大玩中國風，由Gareth.T與葉崇恩共同作曲，請來由黃偉文填詞。出道以來，Gareth.T的廣東歌幾乎都由Wyman包辦，兩人已默契十足。
Gareth.T說︰「《泥菩薩》係今年第四首歌，其實呢首歌已經寫咗兩年，再用咗兩年時間去完成，主題想講善與惡，探討善惡之間複雜關係、觀點與角度。」這個MV更拉大隊到橫店拍攝，十分大陣仗，「首先要多謝視覺創意團隊『東風財運』，我哋由《Boyfreind Material》MV已經合作，因為導演好迷《三國演義》，所以話拍古裝嘅時候，交晒俾佢搞，我只做一個演員，當日拍咗好多個take，由好猛太陽拍到天黑，中間直情有啲熱到中暑，今次真係拍得辛苦！」
我鍾意電影多過音樂
問Gareth.T對演戲有沒有興趣？他直言︰「演戲絕對零興趣，但我覺得自己嘅歌，MV一定要有自己喺入面！我鍾意幕後拍嘢多啲，最終目標係想做導演，其實我鍾意電影多過音樂，某程度上，音樂好似好短暫，只得三、四分鐘，但電影通常都起碼一小時或以上，做電影要投放好多心機同時間，其實我細個讀書時，已經對電影有興趣，但因為日常生活，例如中學都搵唔到同我一樣鍾意睇戲嘅同學，學校都冇呢個科目讀，冇得讀電影，咁就讀音樂囉！從中學開始，不停整歌整歌整歌，所以依家有時導下自己啲MV，我已經十分之享受！」
問Gareth.T喜歡甚麼港產片？他笑說︰「我唔想講王家衛嗰啲，好似好『行』，我最近睇咗《一代宗師》，我就覺得有啲迷，我都鍾意佢嘅戲，但應該未必係我嘅風格！杜琪峯嗰啲係鍾意嘅，尤其佢電影入面嘅對白，我覺得直接啲囉，《黑社會》、《PTU》，最勁係《大事件》開頭嗰個一鏡過的槍戰，真係好勁！」
不時都有網民討論，如果將一些經典翻拍，會有甚麼新人選？早前有網民提出，如果拍新版《古惑仔》，陳浩南由YT周殷廷飾演、山雞就由MC張天賦擔綱，手臂有不少紋身的Tyson Yoshi就演大頭仔，最搞笑有網民建議，由Gareth.T演出原本由林曉峰飾演的包皮一角。Gareth. T一聽到，就狠狠拒絕，他說：「我知道，我都有睇過個post，但冇乜興趣，唔會拍呢個《古惑仔》囉！」
Gareth.T說，一直以來都有電影邀約演出，但就未有機會合作，「之前都有嘅，但可能個劇本睇完覺得唔係好啱，最終都冇拍到。」音樂、時裝、電影，Gareth.T還有甚麼興趣？「我鍾意打拳、鍾意影相、打機、食嘢，其實好多興趣，只係大家比較熟識音樂上的湯令山。」
他與moon tang（鄧凱文）曾是樂壇恩愛小情侶，現在關係有變，只分屬同門歌手，問Gareth.T揀女朋友，是否一定要揀個識音樂？他說︰「唔需要！我覺得絕對唔需要，但係可以識欣賞音樂，或者欣賞藝術都OK，冇話邊種女生特別鍾意，其實高矮肥瘦都OK，真係㗎，我係睇性格㗎！」