MIRROR成員盧瀚霆（Anson Lo）與李駿傑（Jeremy）昨日（26日）舉行《Hi MIRO! 見面祭2025》第二回，既舉杯跟粉絲祝酒，又分組拍照，更不少得表演環節，他們除了跳唱《Money》，並各自唱出《你都有今日》及《滿》。與粉絲單對單近距離的互動環節中，兩人都盡量滿足粉絲要求，不少神徒要求與Anson Lo十指緊扣，亦得償所願。
見面會中設有問答環節，問到如果拍拖會否很黏人時，Jeremy直指Anson Lo好黐身，「佢平時對住我哋都成塊膠布咁，會話攬一攬先！有冇掛住我？所以佢平時對住『神徒』嘅反應好真實，但我未見過佢拍拖一面。」Anson Lo則表示：「你想唔想見到我拍拖一面？我都『黐身』㗎！因為我鍾意人與人之間嘅肢體接觸，覺得攬或搭膊頭都好有力量。如果拍拖，我會攬，然後各自沖涼，之後再攬！」Jeremy聞言以為一起沖涼，Anson Lo隨即回答如果對方想攬着沖涼都得，引得全場粉絲起哄。Anson Lo覺得Jeremy拍拖不黏人，雖然內心需要別人關心，但不會說出來，若然感受不到也會順其自然，Jeremy大表認同。
Anson Lo正在製作新歌，表示前晚剪輯MV花了五小時，之前剪的《Hey Hey OK! 》是連續七小時，今次剪的MV時間已是最少一次。今次推出的是跳唱歌，與《你都有今日》風格及主題完全不同，他透露主題與剛才傾偈的內容有關。他又做出「見牙唔見眼」表情來形容歌名，又提示與味蕾有關，預計8月初推出。
