惟60年代後期，粵語長片式微，修哥因譚炳文牽線轉戰TVB。事緣某天修哥在餐廳吃飯，譚炳文突然走過來問他：「佢話你有冇興趣做電視呀？入面有三個高層想同你傾吓偈，我咪過去傾偈咯，嗰三個高層話你做《歡樂今宵》好冇呀，呢種新嘗試我又想做吓。」修哥又謂當年全靠太太一句說話點醒，令他即使由電影男一轉戰電視做綠葉，也可樂在其中：「我太太話，你既然鍾意做，又咁多年經驗，就唔好嘥咗佢，你鍾意做就做啦，冇所謂嘅，畀佢一言驚醒。咁我咪做電視咯，做人爸爸、做人咩都冇乜所謂，我亦唔覺得自己無咗主角係一件好遺憾嘅事，我只係覺得有戲畀我做，我就盡量做好佢。」
談到轉型後的工作，修哥直指忙到不得了，皆因要同時兼顧《歡樂今宵》、劇集及處境劇的拍攝工作；但「活到老做到老又學到老」的修哥，笑言是愈忙愈開心，並透露當年全盛時期收入可觀：「愈忙我愈開心，多Show呀，喺電視嚟講都算係搵得幾多。」並感恩加入電視圈後得著甚多：「做電視真係畀咗好多嘢我，畀咗好多新朋友我，粵語片時代哩，來來去去都係嗰班人，但電視嚟講不斷有新嘅人入嚟，呢樣係我得著。」修哥又笑言近年最享受的工作是每逢新春扮演財神，皆因「好受歡迎」。
至於以90多歲之齡還在開演唱會，修哥坦言是因為想一嘗破世界紀錄滋味：「我70歲開演唱會之後，一路一路咁樣做落嚟，做到23年左右有人話可以破年紀最大嘅開演唱會紀錄，所以我嘅願望咪就係能夠破世界紀錄咯。」「肯試肯做肯捱不計較」的修哥，還透過是次訪談與後輩分享「演員基本」，盡顯專業精神：「一個演員，最緊要忠於職守，唔好怕蝕底、唔好怕辛苦，樣樣都要用心去做，呢個係做藝人最基本嘅嘢。」
片段中，修哥率先在公司飯堂向「三太」樊亦敏大賣口乖：「嘩！靚成咁嘅！」氹到「三太」即時心心眼；之後去到化妝間，他又會撩化妝部同事傾偈，又會自己拿起風筒set頭「露兩手」。
