鄧英敏今日（11日）亦有拍片分享羅浩楷最近情況，坦言對方的柏金遜症比較嚴重了點，行動又沒有那麼方便：「以前佢仲可以慢慢行吓行吓都可以行到十步八步，後來佢用支棍或者叉擢吓擢吓，咁又可以行十步八步，不過依家長期都要坐輪椅，變咗佢出入好唔方便，因為佢唔可以自己揸部車出去。」
鄧英敏稱6月18日，羅浩楷曾致電給他，傾談了約半小時，知道對方很不開心，因行動不便難以出門遊玩，經常屈在家，幸好羅浩楷對着電腦還可以投資股票。他說：「因為呢十年八載，佢好勤力去研究啲股票係點，然後佢又鍾意玩Day Trade，每日佢嘅成績又唔錯，佢同我講近幾年好少輸，每日都執返多少。」他又跟楷哥說有空致電給他或他們另一個朋友，大家得閒傾偈解悶。
鄧英敏坦言年紀大機器壞是必然，「但最需要嘅都是有人同佢傾偈，咁佢就冇咁寂寞，同埋又可以分散佢啲精神，所以我希望楷哥，你得閒就打幾個電話同啲朋友傾吓偈，呢個唔得閒咪搵第二個。」另外，他又叫楷哥妻子和工人姐姐，每日推楷哥出平台，或到附近餐廳吃一點東西，不用只是對着家裏四面牆太悶。
去年羅浩楷曾跟鄧英敏透露有一個夢想，是希望到街頭Busking，鄧英敏提議可到尖沙咀碼頭的鐘樓附近，他覺得簡單的可以用MMO，但楷哥說一定要用自己琴或結他，自彈自唱，只要楷哥覺得啱時間，他就可以安排，可以約其他朋友四人Band伴着楷哥都可以，最後鄧英敏說：「一句講晒，乜嘢都可以輸，自信心千祈唔好輸，知唔知呀！楷哥，加油！」
