由林海峰（Jan）、葛民輝、韋羅莎及柯煒林（Will）主演的舞台劇《笨蕉大劇院》，昨晚（8日）假香港演藝學院歌劇院正式公演。由於Will身體抱恙，團隊和Will都希望能在最佳狀態下參與演出，故其角色暫改由演員余家溢替補。
Jan於首演謝幕時特別向一眾台前幕後致謝，包括導演鄧偉傑、副導演兼Acting Coach 張銘耀（German）及編劇李偉樂，又特別感激牽頭促成今次演出的俞琤（YT）。談及整個舞台劇的準備過程，Jan感慨道：「其實呢個舞台劇都籌備咗接近一年，成個團隊都諗緊呢個劇本好唔好、收到劇本後又會諗啲對白寫得好唔好、我哋跟住導演同Acting Coach嘅指導又做得好唔好，同其他演員點配合會更加好？又或者我自己對劇本嘅理解，甚至待人接物方面做得好唔好？呢啲問題一路都纏繞咗12個月，直至有一日我發現所有嘢都唔係好重要，最緊要係——身體好。」
Will隨即驚喜現身舞台，跟觀眾打招呼及鞠躬致謝：「多謝你哋一直以嚟嘅關心同鼓勵，唔好意思，我呢個衰仔要令大家擔心。」當台下觀眾喊出「加油」，Will忍不住講笑：「呢個咪冇睇我啲Post囉，我都話唔要聽加油㗎，我要聽嘅係咩呀？——1、2、3！」他一喊「USH」，台下即時回應：「我愛你！」氣氛溫馨感人。
Will續指：「我好榮幸，第一個參與嘅舞台劇就係同呢一班台前幕後嘅工作人員、同埋演員，一班咁正嘅人去合作，因為無論喺我發生咗啲小毛病之前定之後，佢哋都好照顧我，劇場真係一個好魔幻嘅地方。」他向觀眾承諾：「放心，我冇事。我會照顧好自己嘅身體，然之後再喺呢度表演畀大家睇。」全場報以熱烈掌聲。他再問觀眾：「你哋會等我㗎嘛？」聽到觀眾的熱情回應後，即擺出大心心手勢致謝回禮。Jan又鼓勵現場觀眾為Will送上祝福，觀眾即時大聲呼喊支持，Will攤開雙手接收觀眾窩心的祝福，如雷的歡呼聲令Will不禁掩面抹淚，演員們亦送上擁抱給予鼓勵。
最後，Jan打趣說：「大家今晚睇完之後，如果覺得有咩做得唔好嘅，例如係我做得唔好嘅，隨便留言，但最尾一定要寫低一句：『要身體好』。」舞台劇《笨蕉大劇院》在一片感動與鼓勵的掌聲與歡呼中揭開序幕，期待接下來的49場演出，繼續讓觀眾沉浸於這齣悲喜劇之中，同時一起祝福 #柯WillBeFine！
