昨晚在「景然棧」的晚飯，讓我偷孝活文縐縐的結論，是舒解大家近日鬱結的心情，是解慰酒，ＢＢ一歲就識做的鬥雞眼，我可以維持三分鐘去吃完一杯雪糕的鬥雞眼，都易是惹笑的功臣。彭美拉人人都見到的紅眼珠，仍趕來陪大家吃最後一道甜品，秒秒鐘都放開心情陪笑，她為了不掃興，寧願心事改約今早再來酒店申訴。
「Maria姐姐你對我好好，但我唔得閒為嗰個女人烚氣，一滴眼淚都唔會為佢流。」
「你仲係冇你媽咪喺英國嘅聲氣？」
「係佢身體愈嚟愈差，有時講電話，講講吓唔知我係邊個……有次佢仲話見我個細佬爬上佢牀同佢一齊瞓覺，我話阿細佬已經應該好大個仔，佢聽咗就喊到冇再講到嘢……我係掛住佢，想快啲過去，見得一次得一次。」
「咁你同Howard唔出聲，聽日飛咗咪得囉？」
「佢係驚一唔見咗我哋兩個，佢爹哋同佢後底乸，會向我哋一家人發爛渣，要Auntie Mary同你哋交人，阿Pam呵？」
「嘩，咁Sweet叫阿Pam，我好少見佢咁肉緊……」
「做乜你仲講得笑落！」
「你睇吓個個幾錫你，呢個Maria姐姐第一次對我咁惡。」
「易Uncle你都可以咁叫我，一家人個個都可以咁叫我，但係噚日ＢＢ攬住我隻腳喊，猛叫我姐姐，我唔係做戲，我真係當正我細佬返嚟，我都即刻喊出嚟……」
「老竇你知唔知佢阿Pam臨出門口之前，嗰個癲婆……So sorry，我咁叫佢……」
「幾好呃，以後就咁叫喇……」
「話如果兩個想結婚，就最好叫我入贅佢哋屋企喎。」
「吓……佢呢個……真係癲婆，玩到冇嘢好玩喎。」
「咁又幾好玩喎，一於叫我個仔開個天價，如果想打個八折，就直接嚟搵我。」
「佢就玩完㗎啦，我阿媽係俾呢個女人仲係個私家看護，攞個我阿爸最貴花樽，詐帝喺後面跣親，鋤落我阿媽個頭度，死唔去，醒番就好退化，唔似之前個人，但偏偏又生到個男仔，呢個癲婆索性買通個黃綠醫生，落毒喺我阿媽餵我細佬食嘅嘢度，我算好彩，一直都冇死到咋。但係，唔知係邊個神揀咗今時今日，嗰陣時啲俾佢收買或者係人證俾佢趕絕嘅，啲後代唔係中晒降頭，肯嚟搵阿天奴叔，願意出嚟指證當年嘅真相。」
「咁終於等到天收佢，你仲等乜嘢？」
但我和孝活立即反對，齊聲唱雙簧：「幾十年前嘅人證物證，法律上已經過期兼失效，兼且公開晒𢦓件事，可能你個後底乸係想攻擊我哋，為佢勾結東歐嗰班阿蓋Uncle嘅對頭人，引到Uncle出嚟，咁我哋兩件事，都輸晒……」
「兼且你爹哋縱容身邊個女人咁多年，佢都慣咗，臨老先至一鑊泡，名譽地位都冇晒，佢一定撳住你單官司，幾錫你都係咁話。」瑪莉亞比彭美拉更失望：「講得好啱，但我哋個個就咁要忍成世咩？阿Pam，男人係咁實際，阿Mary姐實諗到啲我哋諗唔到嘅嘢，我一定企喺你嗰便。」
彭美拉合上眼，幾個人都悶聲不響，她很平靜的再開口：「為咗我阿媽，為咗我個細佬……我可以親手去解決呢個人……我阿爸要顧全佢嘅地位，佢一定唔會去告發佢個女……」。
我的乖仔真的已愛上這個敢愛敢做的女子，一個馬步就坐上前，雙臂用力攬到實一實，同命鴛鴦一樣。