一天，兒子忽然間說：有沒有留心，現在香港街道上，見不到沒有大人在身邊的孩子。一言驚醒，真的沒有。隨着城市急速發展，高樓大廈林立，三幾十年間，整個社會結構改變之大，真係得人驚，一些家庭生活習慣已經完全改變。那年代，一個主婦在忙家務，忽然間想起缺少點什麼，會說：「B仔，幫我落街去雜貨舖買一毫子麵豉返嚟啦。」B仔就會拿了一毫子落街買麵豉去了。結果半個鐘頭才回到家裏，半個鐘頭是買麵豉用去八分鐘，其餘時間在街頭蹓躂，如踢隻花貓一腳，到士多舖看有什麼過癮器物，B仔買麵豉只用了斗零，將剩下的斗零拿去打幸運獎機，得到一粒糖，同埋心愛的貼紙、公仔。遇到小朋友又有他們的遊戲，開雞啄唔斷之口水會，俱往矣。今天的孩子是在圈養下成長的，一切都被安排好。陰功，兩歲就要去學法文了，除了香水，法國真的是香的嗎？可知道法國香水勁是因為法國女人少沖涼呀！也難怪，小孩子開始識講話就要催谷，否則，連幼稚園也入不了，如果沒有名校幼稚園打底，名牌小學怎樣去讀？管你家財萬貫，名校招生必定打崩頭，通宵報名條人龍，咪話唔嚇人。入到小學，除咗補習外，大把技能要去學：鋼琴、小提琴係必修科目，還有長笛、琵琶、笙、鼓、小號、法國號……樣樣皆精，怎少得要學畫，做運動，各球類運動都要涉獵，田徑、游泳最好能出人頭地。小朋友的時間，早早被排到滿滿的，有少少空閒都用嚟打機啦，出街做乜嘢呀？連士多舖都愈嚟愈少咯，仲係幾十年前咁老土咩！