「職業無分貴賤」，什麼時候聽來像風涼話？
就是當《輪流傳》的「女孩們」解文意（李司棋）、王穎兒（森森）、翟粵生（李琳琳）、陳婉嫻（黃韻詩）拉隊到電影院探望當帶位員的「舊」同窗黃影霞（鄭裕玲）。
電影開影了，全身戲院制服的她繼續陪眾人聊天。那畫面是黃在提供「雙重服務」，座上的是顧客，又是親友團。顧客入座了工作便完事，親友團則不能待慢，一雙腳雖已累得賊死，也只能邊應酬邊往牆靠去。
還要應付解文意左丟出一句：「你唔坐得低㗎咩？咁樣同你講嘢好辛苦。」右又一句：「你睇過好多次㗎啦呵？有邊度係驚嘅，早啲話聲我哋聽喎。」
黃反問：「幾早話定你聽先呀？」沒在語氣中味出苦澀的解文意答：「又唔好太早喎，太早又咩嘢都睇唔到。」同人唔同命，黃說：「我都由驚睇到唔驚咯。」
解文意口頭說害怕，心思仍在小賣部的蓮花杯上。同行的司機盧正（鄭少秋）請纓當跑腿，似樂得離開被大小姐命令坐到她身旁的座位。「快啲返嚟喎」，有嚇人畫面時，他得獻上給她遮住眼睛的膊頭。
「你就順頭順景啦，正一出路遇貴人，我就遲早都要搵過第二份。」戲院一角，黃無路訴的苦中也帶酸。
「你來來去去都係嫌份工時間長困身啫係麻？」算是對她的勸解。
「錢又唔係話好多喎，最慘係，我不嬲咁緊我細佬妹讀書讀成點。自己讀書唔成啫，自己唔好幾時都望佢哋好嘅，呢，佢哋臨考試幾廿樣都唔識嘅，無時間教佢哋就無啦，我阿媽把口你都知㗎啦，動不動就話㧬呢個去做學師仔，又呢又路，搞到兩隻嘢苦連連，見親我都攬到我實。」身為人姊，就有責任。
「得一唔得二，搵食呀嘛，女仔人家有好多嘢又唔做得嘅。」他也是愛莫能助。
「計得咁多咩，我呢份都係馬死落地行㗎咋，如果有份好啲㗎呢我就去㗎啦，丟得個身出嚟做嘢，唔通仲當自己千金小姐咩。」弦外之音是？
「你阿媽都唔想你出嚟拋頭露面嘅，如果唔係，佢自己洗咩捱咗咁多年，一早就㧬咗你出嚟做嘢啦。」提醒她潔身自愛也不只為自己。
「我喺屋企釘珠仔釘得少呀？啲手指好似上曬鍊咁呀，隻隻都起曬泡啦，咁又唔啱，咁又唔啱，我都唔知佢想我點，係囉喎，得咁多頭獎馬票等住我哋呢亭人嚟中啦。」愈說愈心灰。
「咩解你也唔學似我咁，叫阿二小姐託吓人事，佢屋企又咁有面。」終於入正題。
「我……我唔想求佢。」
「咁點解介紹我你又肯求佢？」
「我同佢無緣。我唔怕人睇小我，總之就無緣啦。我信我自己一定有法子，總有一條唔係掘頭路。」
其實，與她無緣的，何止解小姐？